JAMII YATAKIWA KUJIEPUSHA NA VITENDO VYA KIKATILI

Imetumwa : December 10th, 2024

Na Sizah Kangalawe 

Habari - Dodoma Rs

Wananchi wa Dodoma wametakiwa kukemea na kuondokana na tabia za ukatili wa kijinsia unaofanyika ndani ya jamii wanazoishi ili kuandaa jamii iliyobora na yenye maendeleo kwa Taifa.

Hayo yalisemwa na Mkuu wa Mkoa wa Dodoma, Rosemary Senyamule, alipokuwa akizungumza na hadhira katika Kongamano la kilele cha siku 16 za kupinga ukatili wa kijinsia, lililofanyika katika ukumbi mikutano wa 'Dear Mama' jijini Dodoma.

Aidha, Mhe. Senyamule alizitaja takwimu za mwenendo wa matukio ya ukatili mkoani Dodoma,ambapo alisema kuwa kwa Mwaka 2023 (Januari - Agosti) matukio yaliyoripotiwa yalikuwa 3,012 huku watoto wakiwa ni 846 na watu wazima ni 2,166. Pia alisema kwa Mwaka 2024 (Januari - Agosti) matukio yamepungua hadi kufikia 2,352 huku watoto wakiwa 529 na watu wazima wakiwa 1,723.

Sambamba na hilo, Senyamule alitoa rai kuwa jamii iendelee kuelimishwa kuhusu madhara ya ukatili wa kijinsia na kuwataka wananchi kutosita kutoa ushirikiano endapo kuna viashiria au ufanyikaji wa vitendo vya ukatili ili hatua stahiki zichukuliwe kwa watakaobainika.

"Dkt. Samia Suluhu Hassan, amekuwa akifanya jitihada kubwa katika kutokomeza  ukatili wa kijinsia, amefanya mambo mengi baadhi yake ni ujenzi wa Shule zakutosha, utoaji wa mikopo kwa wanawake, urahisishaji wa huduma kama ya upatikanaji wa maji pamoja na uwepo wa nishati safi. Hayo yote ukiyatazama kwa undani, yamechangia kwa sehemu kubwa kupunguza matatizo hayo ya ukatili wa kijinsia" alisema Senyamule.

Senyamule alisema yupo tayari kutoa msaada na ushirikiano kwa yeyote atakayetoa taarifa katika ofisi yake kuhusu utendekaji wa matukio ya ukatili wa kijinsia.

"kila mmoja akatimize wajibu wake kwa kuhakikisha hakuna tendo la kikatili linalotendeka mbele yake, kwa kufanya hivyo tutaikomboa Dodoma" alisema Senyamule.

Ikumbukwe kuwa siku 16 za kupinga ukatili wa kijinsia hufanyika kuanzia tarehe 25 Novemba hadi tarehe 10 Desemba kila mwaka, kwa mwaka 2024 maadhimisho ya siku 16 za kupinga ukatili wa kijinsia yameongozwa na kauli mbiu inayosema “Kuelekea Miaka 30 ya Beijing: CHAGUA Kutokomeza Ukatili wa Kijinsia”