KAMATI YA USHAURI YARIDHIA KUGAWANYWA MAJIMBO YA DODOMA MJINI NA CHEMBA

Imetumwa : March 24th, 2025

Na. Hellen M. Minja,

       Habari – DODOMA RS

Kamati ya Ushauri ya Mkoa wa Dodoma (RCC), leo Machi 24, 2025, imeridhia mapendekezo ya kugawanywa kwa Majimbo ya uchaguzi ya Dodoma Mjini na Chemba wakati wa kikao kilicholenga kujadili ajenda ya kugawa Majimbo hayo ambayo yanatajwa kuwa makubwa na kuathiri upatikanaji wa huduma za haraka kwa wananchi wa maeneo hayo.

Kikao hicho kimefanyika katika Ukumbi wa mikutano wa Ofisi ya Mkuu wa Mkoa, Jengo la Mkapa Jijini Dodoma ambapo taarifa iliwasilishwa mbele ya mwenyekiti wake Mkuu wa Mkoa wa Dodoma Mhe. Rosemary Senyamule juu ya sababu za kugawanywa kwa Majimbo hayo, nae akasema;

“Tumekubaliana kuwa majimbo haya yagawanywe, nendeni mkayafanyie kazi Wilaya husika na leo hii muache nyaraka ambayo ni sahihi lakini kuridhia lilikua ni jambo la msingi. Nisisitize wataalamu endeleeni kufanya vitu kwa usahihi ili mtupatie vitu ambavyo vipo sawasawa”

Akiwasilisha taarifa mbele ya Mwenyekiti wa Kamati hiyo, Mwanasheria kutoka Ofisi ya Mkuu wa Mkoa wa Dodoma Bw. Jofrey Pima, ametaja vigezo vilivyozingatiwa na Menejimenti katika ugawaji wa Majimbo hayo.

“Katika ugawaji wa majimbo hayo, Menejimenti ilizingatia kuongeza wigo wa uwakilishi wa wananchi wa Jimbo la Dodoma Mjini na lile la Chemba pamoja na wananchi kupata huduma ya Mbunge wao kwa urahisi ikiwa  ni pamoja na kutatuliwa changamoto zao kwa wakati” Amesema Bw. Pima

Hata hivyo, Mbunge wa Dodoma Mjini Mhe. Anthony Mavunde amesema kuwa kutokana na ukuaji wa kasi wa Jiji la Dodoma, kuna ulazima wa kuwepo kwa namna nzuri ya kusogeza huduma za kijamii na kimaendeleo zaidi kwa wananchi kwa kuwa na uwakilishi wa zaidi ya Jimbo moja.

Mapendekezo ya kikao hicho yatapelekwa kwenye Tume Huru ya Taifa ya Uchaguzi kwa ajili ya kuridhia mchakato wa kuyagawa Majimbo hayo ambapo endapo itaridhia, Majimbo hayo yatagawanywa na kuwa Jimbo la Dodoma Mjini, Jimbo la Mtumba, Jimbo la Chemba Mashariki na Jimbo la Chemba Magharibi.

#dodomafahariyawatanzania

#keroyakowajibuwangu#mtiwangubirthdayyangu