KAMPENI YA MTI WANGU BIRTHDAY YANGU YAZINDULIWA CHEMBA

Imetumwa : March 17th, 2025

Na. Hellen M. Minja,

       Habari – DODOMA RS

Katibu Tawala Mkoa wa Dodoma Bw. Kaspar K. Mmuya amezindua rasmi kampeni ya ‘mti wangu birthday yangu’ katika Halmashauri ya Chemba kwenye shule ya Sekondari Kidoka mnamo Machi 17, 2025 ambapo miche ya miti 300 ya matunda imepandwa shuleni hapo.

Akizungumza na Walimu na Wanafunzi wa shule hiyo, Katibu Tawala huyo ametaja lengo la upandaji wa miti ya matunda katika shule hiyo kuwa ni kuwajengea watoto hao utamaduni wa kukuza uchumi kupitia biashara ya matunda

“Nimekuja shule hii kuwafundisha watoto hawa faida za miti ya matunda, kwanza utamfundisha kupenda mazingira, mti huu ukiwa mkubwa utaleta kivuli, mti huu utatoa matunda, atakula mwenyewe yatamjengea afya njema lakini pia utamfundisha kuwa ana uwezo wa kufanya biashara na kujua thamani ya fedha pindi atakapokua mkubwa”. Bw. Mmuya

Kadhalika, Katibu Tawala Mkoa ameongeza kuwa Msingi wa program hiyo sio kupanda idadi kubwa ya miti tu bali ni miti inayopandwa inakua, haipotei wala kukauka kwani asilimia 100 ya miti yote iliyopandwa katika kampeni hiyo ipo na utunzaji wake unaendelea

Kampeni ya ‘mti wangu birthday yangu’ ni utekelezaji wa maagizo ya Mhe. Rais aliyoyatoa kwa viongozi aliowateua Aprili 06, 2021, kupanda miti ili kurudisha uoto uliopotea kutokana na uharibifu wa mazingira. Dodoma inatekeleza agizo hilo ambapo mpaka sasa takribani miti 4500 imepandwa tangu kuzinduliwa kwa kampeni hiyo Oktoba 18, 2024.

#dodomafahariyawatanzania

#keroyakowajibuwangu

#mtiwangubirthdayyangu