KAMPENI YA TWENDE BUTIAMA YATOA MADAWATI 100 NA KUPANDA MITI 1000 DODOMA

Imetumwa : October 1st, 2024

Na ; Happiness E. Chindiye

        Habari - Dodoma RS

Katika kuunga mkono jitihada za Serikali ya Jamhuri ya Muungano wa Tanzania kwenye sekta ya Elimu na Utunzaji wa Mazingira, kampeni ya Twende Butiama 2024 inayohusisha kikundi cha Waendesha Baiskeli inayo dhaminiwa na Kampuni ya Mtandao wa Simu Vodacom Kanda ya kati na Benki ya Stanbic, imetoa madawati 100 katika Shule ya Msingi Dodoma Makulu na miti 1000 kwa ajili ya kuendelea kukijanisha Jiji hili.

Hafla hiyo ilifanyika  katika Shule ya Msingi Dodoma Makulu Oktoba Mosi, 2024 Jijini Dodoma.

Akizungumza na hadhara hiyo kaimu mkuu wa mkoa ambaye ni katibu tawala wa mkoa wa Dodoma Bw. Kaspar K. Mmuya amewasihi  kuendelea kusimamia misingi ya Baba wa Taifa Hayati Mwalimu Julius Kambarage Nyerere na Mhe. Rais Dkt. Samia Suluhu Hassan.

“ Haya ndio maisha aliyokuwa akiishi Baba wa Taifa Mwalimu Julius Kambarage Nyerere, hakuwa mbinafsi, alipenda umoja ,uzalendo wa kweli kwa vitendo na Amani kama mnavyofanya, hivyo simamieni misingi hiyo “ Ameeleza Bw. Mmuya

Naye Mkuu wa Kanda ya Kati Kampuni ya Simu Vodacom Bw. Joseph Sayi ameahidi kuendelea kushirikiana na Serikali na kuunga mkono jitihada za Mhe. Rais katika sekta ya elimu na utunzaji wa mazingira.

Kwa upande wake M/ Kiti wa msafara wa Twende Butiama Bw. Gabriel Landa amesema safari hiyo ya kwenda Butiama kwa Baiskeli inalenga kumuenzi Baba wa Taifa kwa vitendo na kuziishi  falsafa zake ikiwemo ya kupambana na maadui wa tatu wa maendeleo ambao ni ujinga , umasikini na maradhi.

“ Tumekuwa tukifanya hayo kwa  miaka sita sasa, ambapo tunashirikiana na wadau mbalimbali tumeweza kukabidhi madawati zaidi ya 1000 katika shule zaidi ya 13 hadi kufikia mwaka jana,na tumeweza kupanda miti zaidi ya elfu hamsini na kuhamisisha Watanzania kujali afya zao kupitia program mbalimbali “ Ameeleza Bwa. Landa

Kikundi cha Waendesha Baiskeli hao wakiendesha Baiskeli kuelekea Butiama ambapo kilele chake ni tarehe 14 Oktoba 2024 katika siku ya Mwalimu Nyerere kinahusisha   takribani watu 90, ambapo wanawake ni 5 na wanaume 85 kutoka Tanzania Bara na Visiwani.

&&&

#dodomafahariyawatanzania

#keroyakowajibuwangu