KITUO CHA DAMU SALAMA KANDA YA KATI CHA ZINDURIWA DODOMA

Imetumwa : June 14th, 2023

Waziri wa Afya Mhe. Ummy Mwalimu amezindua Jengo la Mpango wa Taifa wa Damu Salama Kanda ya Kati Dodoma na kuzielekeza Hospitali zote za Rufaa za Mikoa zianze mpango wa utekelezaji wa mazao ya damu, ikiwa ni sehemu ya Maadhimisho ya Siku ya mchangia damu duniani yaliongozwa na kauli Mbiu "Changia Damu Changia Mazao ya Damu (plasma ) mara kwa mara”

Maadhimisho hayo yamefanyika leo Juni 14, 2023 katika eneo la Itega, Jijini Dodoma na kuhudhuriwa na Naibu Katibu Mkuu, Wizara ya Afya Dkt. Grace Magembe, Mhe. Kim Sun Pyo, Balozi wa Korea ya Kusini hapa nchi, Dkt. Best Magoma, Mganga Mkuu Mkoa, wawakilishi wa Mashirika ya Kimataifa na wadau wa Maendeleo.

"Takwimu za ukusanyaji damu, zimeonesha mafanikio ya ongezeko la ukusanyaji wa damu mwaka hadi mwaka. Mwaka 2022/2023, Mpango umeweza kukusanya chupa za damu 495,600 sawa na asilimia 84 ya mahitaji ya damu nchini ikilinganishwa na chupa 366,206 zilizokusanywa mwaka 2021/2022 sawa na asilimia 67 ya mahitaji". Amesema Mhe. Ummy

Aidha, Waziri Ummy ametoa maelekezo kwa vituo vya afya ili kupunguza vifo vya akina mama vinavyotokana na kuvuja damu wakati wa kujifungua.

"Takwimu zinaonesha kwamba, Tanzania ina vifo 556 vya akina mama Wajawazito (Maternal deaths) katika vizazi hai 100,000. Na kisababishi kinachoongoza katika vifo hivi ni kuvuja damu nyingi wakati wa kujifungua (Postpartum haemorrhage) ambayo inachangia kwa takribani asilimia 43 ya vifo vyote”

"Kwanza, Kila hospitali ya Rufaa ya Mkoa ianze utengenezaji wa mazao ya damu ili kuongeza wigo wa upatikanaji wa plasma (FFP) kwa ajili ya kuokoa maisha ya akina mama hawa. Pili, Vituo vyote vinavyotoa huduma za mama na mtoto vinunue majokofu kwa ajili ya kuhifadhia mazao damu aina ya plasma.

"Idara ya Mama na Mtoto iwezeshe Mpango wa Taifa wa Damu Salama kufanya mafunzo ya matumizi ya sahihi ya damu hasa matumizi ya plasma kwa akina mama wanaovuja damu nyingi wakati wa kujifungua kwa kuwa tafiti zinaonyesha matumizi yasiyo sahihi ya damu yanayofikia asilimia 67.2 hupelekea uhitaji wa kufanya mafunzo kwa watoa huduma za afya wanaohusika kuwaongezea damu wagonjwa."Amesisitiza Mhe.Ummy

Aidha, Wizara ya Afya imezindua kanzidata kwa ajili ya Wachangia damu wenye makundi adimu ya damu (Rh negative). Kanzidata hiyo itawasaidia Wachangia damu wenye makundi adimu kutambuana na kusaidiana pale mmoja wao anapokuwa na uhitaji wa damu ya kundi adimu. Vilevile, kanzidata hii itauwezesha Mpango kuweza kuratibu upatikanaji wa damu kunapokuwa na dharura mahali popote nchini.

Naye. Mkuu wa Mkoa wa Dodoma Mhe. Rosemary Senyamule ameendelea kuishukuru Serikali ya Awamu wa sita inayoongozwa na Mheshimiwa Dkt. Samia Suluhu Hassan Rais wa Jamhuri ya Muungano wa Tanzania kwa kuendelea kuboresha sekta ya Afya na kwa kuchagua Mkoa wa Dodoma Kanda ya kati kuweza kujenga Jengo la Damu Salama, hii itawezesha Wananchi kuweza kupata matibabu kwa haraka na kuokoa maisha ya wengi.

Vilevile, katika Maadhimisho hayo idadi ya vyeti 17 viligawiwa kwa wachangiaji Bora wa Damu nchi nzima na tuzo. Bw. Emmanuel Lembe alipatiwa tuzo na KOICA kwa kuchangia damu zaidi ya mara nyingi 94,Timu ya Mpira wa Mguu ya The Dar es Salaam Young African wamechangia chupa 727, Shule ya Sekondari Lyamungo chupa 620, Exim Benki na Azam Media .