KIWANDA CHA KUUNGANISHA PIKIPIKI NA BAJAJI KUANZISHWA CHAMWINO, DODOMA

Imetumwa : July 22nd, 2025

Na. Hellen M. Minja

       Habari – DODOMA RS

Mkoa wa Dodoma unatarajia kuanza sehemu ya pili ya utekelezaji wa Mpango wa ushirikiano na Wawekezaji kutoka Kampuni ya LIFAN GROUP ya nchini China ambao wanatarajia kuwekeza kwenye kiwanda cha kuunganisha Pikipiki na Bajaji katika Wilaya ya Chamwino.

Wawekezaji hao kutoka Kampuni za LIFAN GROUP na TAMOBA za nchini China, wamefika katika ofisi ya Mkuu wa Mkoa wa Dodoma, Jengo la Mkapa, Jijini hapa na kufanya mazungumzo mafupi yaliyoambatana na kutangaziwa fursa mbalimbali za uwekezaji zinazopatikana Makao Makuu ya nchi.

Akizungumza kwa niaba ya Mkuu wa Mkoa wa Dodoma Mhe. Rosemary Senyamule, Katibu Tawala Msaidizi Seksheni za Viwanda, Biashara na Uwekezaji Bi. Mwajabu Nyamkomora amesema katika Wilaya ya Chamwino, tayari kuna eneo la Ekari 100 lililotengwa kwa ajili ya uwekezaji na Serikali imeshawekeza Mkoa huu kwa ajili ya Sekta binafsi.

Aidha, Mkurugenzi Mkuu na Mwakilishi wa Kampuni ya TAMOBA Bw. Joseph Kimisha amesema wamechagua Mkoa wa Dodoma kuwa kitovu cha kuhudumia Kanda zao zote Sita ambazo ni Kanda ya Ziwa (Mwanza), Kanda ya Kaskazini (Arusha), Kanda ya Mashariki (Dar es Salaam), Kanda ya Kusini (Mbeya), Kanda ya Kati (Dodoma) na Kanda ya Nyanda za Juu Kusini.

Ujumbe wa Wataalam hao umeongozwa na Bw. Joseph Evarist Kimisha – Mkurugenzi Mkuu TAMOBA, Bw. Xiong Wey – Mwakilishi wa LIFAN GROUP na TAMOBA, Bw. Godwill Benda - Mkuu wa Idara ya Sheria na Mipango, Bi. Agness Masokola – Mkurugenzi wa Utawala na Biashara.  

#takedodomatotheworldandbringtheworldtododoma

#dodomawearereadyforyou

#dodomafahariyawatanzania

#wekezadodomastawishadodoma