MAFUNZO YA VIKUNDI MAALUM CHACHU YA KUBORESHA SHUGHULI ZA VIWANDA

Imetumwa : October 8th, 2025

Na Elizabeth S. Dai – DODOMA

Mafunzo kupitia mfumo jumuishi wa vikundi vya wanawake, vijana na watu wenye ulemavu yametajwa kuwa chachu muhimu ya kuboresha shughuli za kiuchumi kwa wanufaika wa vikundi hivyo.

Kauli hiyo imetolewa leo na Katibu Tawala wa Mkoa wa Dodoma, Dkt. Khatibu Kazungu, wakati akifungua mafunzo kwa vikundi vilivyokidhi vigezo vya kupata mkopo wa asilimia 10, katika ukumbi wa Nala Hotel, Jijini Dodoma, tarehe 8 Oktoba 2025.

Dkt. Kazungu amesema mafunzo hayo yanalenga kuongeza ujuzi na maarifa kwa wanavikundi ili waweze kuendesha miradi yao kwa tija na kutatua changamoto wanazokutana nazo katika shughuli zao za kila siku.

“Naamini mafunzo haya yatawawezesha kuboresha shughuli zenu za kiuchumi na pia kupata mbinu bora za kutatua changamoto za uendeshaji wa miradi ya vikundi,” alisema Dkt. Kazungu.

Aidha, amewapongeza washiriki wa mafunzo hayo kwa kujitokeza kwa wingi na kuonyesha dhamira ya dhati ya kuboresha maendeleo ya vikundi vyao.

“Nawapongeza wanavikundi wote kwa kuhudhuria mafunzo haya ya awamu ya pili. Nimeelezwa kuwa jumla ya vikundi 14 vyenye wanachama 54 vimeshiriki, jambo linaloonyesha mwamko mkubwa wa kujifunza,” aliongeza Dkt. Kazungu.

Kwa upande wake, Meneja wa Tawi la LAPF, Bw. Honest Mushi, ameipongeza Serikali ya Awamu ya Sita kwa kuboresha mifumo ya utoaji wa mikopo, hatua iliyowezesha Benki ya CRDB kufikia halmashauri tano ikiwemo Halmashauri ya Jiji la Dodoma.

Mafunzo hayo yameandaliwa na CRDB Foundation kwa lengo la kuwajengea wanavikundi uwezo katika masuala ya uendeshaji na usimamizi wa miradi pamoja na namna bora ya kukopa na kurejesha mikopo.

#DodomaFahariYaWatanzania

#NimejiandikishaNitapigaKura

#UmejiandikishaKapigeKura