MABALOZI WASHAWISHIWA KUWEKEZA DODOMA KWANI INA VIGEZO VINAVYOJITOSHELEZA

Imetumwa : May 27th, 2025

Na. Hellen M. Minja

       Habari – DODOMA RS

Mabalozi wanaoziwakilisha nchi zao hapa Tanzania wamehamasishwa kuzishawishi nchi hizo kuwekeza katika Mkoa wa Dodoma kutokana na Mkoa huu kuwa na vigezo vyote muhimu na vinavyojitosheleza kuvutia wageni ikiwemo ardhi ya kutosha kwa ajili ya biashara na uwekezaji inapatikana na uhitaji wake ni mkubwa.

Hayo yamebainishwa na Waziri mwenye dhamana ya Mambo ya nje na Ushirikiano wa Kimataifa Mhe. Balozi Mahmoud Thabiti Kombo alipokua akizungumza na Mabalozi hao kwenye Mkutano na baadae ziara iliyopewa jina la ‘Diplomatic Capital City Tour’ leo Mei 27, 2025 katika Ukumbi wa Sephil Sepphire Jijini humu.

“Dodoma kuna fursa za biashara na uwekezaji kwa kuwa ina ardhi ya kutosha yenye maji au uwezo wa kuchimba visima, utalii, Mahoteli na uhitaji wake ni mkubwa sana. Maeneo yanayoonekana kuwa mbali na mji, muda si mrefu hayataonekana kuwa mbali kwa sababu mahitaji ya makazi na Mahoteli ni makubwa mno hivyo changamkieni fursa hii”.

Aidha, Naibu Waziri wa TAMISEMI Mhe. Zainab Katimba amesema Serikali katika kipindi hiki cha miaka minne imewekeza zaidi ya shilingi Trilioni 5.1 kwenye uboreshaji wa elimu ambapo takribani shule za Msingi 1,399 na shule za sekondari 1,044 zimejengwa sambamba na ujenzi wa Mabweni, Maabara pamoja na nyumba za walimu.

Hata hivyo, Mkuu wa Mkoa wa Dodoma amezungumzia miradi ya kimkakati inayotekelezwa Mkoani hapa ambayo inaufanya kuwa na hadhi ya Makao Makuu ya nchi na kuwa chachu ya kuvutia wawekezaji kutoka nje ya nchi.

“Serikali imewekeza miradi mikubwa ikiwemo ujenzi wa Mji wa Serikali Mtumba, ujenzi wa Reli ya mwendo kasi (SGR), ujenzi wa barabara ya mzunguko wan je, Kiwanja cha ndege cha Kimataifa Msalato, miundombinu ya umwagiliaji, kituo cha kupozea umeme kutoka Bwawa la Mwalimu Nyerere ambapo miradi yote imegharimu zaidi ya shilingi Trilioni 10”.

Akizungumza baada ya hafla hiyo, Balozi wa China nchini Mhe. Dr. Lu Youqing, amesema nchi yake inaunga mkono maendeleo ya Tanzania na ameshawishi makampuni ya nchini mwake kutembelea Dodoma na kuleta shughuli zao za kibiashara hapa ili kupata maendeleo ya kibiashara pamoja.

Naye, Mkurugenzi wa Halmashauri ya Jiji la Dodoma Dkt. Fredrick Sagamiko ametumia wasaa huo kuelezea juu ya mradi unaotarajiwa kutekelezwa Hombolo kwa kuufanya kuwa Mji wa Kidiplomasia kutokana na uwepo wa Ziwa Hombolo ambalo lipo umbali wa Km 70 kutoka Dodoma Mjini na eneo hilo ni la kimkakati kwani lipo karibu na Mji wa Serikali, eneo la Mabalozi pia kiwanja cha ndege cha Msalato.

Sanjari na Mkutano huo, Mabalozi hao walipata fursa ya kutembelea miradi kadhaa ya kimkakati kwa kuanzia kwenye huduma za afya ambapo walitembelea Hospitali ya Kanda ya Benjamin Mkapa na kujionea huduma za kisasa zinazotolewa, walitembelea ujenzi wa Mji wa Serikali Mtumba na mwisho walitembelea mradi wa Kiwanja cha Ndege Msalato.

 ‘ Capital City Diplomatic Tour’, imeandaliwa kwa kutambua mchango wa Rais Mhe. Dkt. Samia Suluhu Hassan ambaye amejenga mahusiano mazuri na nchi zote Duniani,hali inayowafanya wafurahie kuja Tanzania, na haya yote wamekua wakiyafanya katika nchi mbalimbali hivyo sasa ni zamu ya Dodoma.

Kaulimbiu: “Dodoma ipo Tayari kwa Ajili yenu (Dodoma Were Ready For You)”

#takedodomatotheworldandbringtheworldtododoma

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu