MADEREVA WA SERIKALI WATAKIWA KUZINGATIA SHERIA ZA USALAMA BARABARANI

Imetumwa : May 17th, 2025

Na. Hellen M. Minja

       Habari – DODOMA RS

Madereva wa magari ya Serikali wametakiwa kuzingatia sheria, kanuni na taratibu zilizowekwa kwa ajili ya usalama barabarani pindi wanapokuwa wakiendesha magari hayo.

 Hayo yamebainishwa Mei 17, 2025 na Kamanda wa Polisi Mkoa wa Dodoma SACP George Katabazi wakati akizungumza na madereva hao kwenye kikao maalumu alichokiitisha katika ukumbi wa PGA Jijini Dodoma kilicholenga  kuzungumza nao juu ya utii wa sheria za usalama barabarani kwani baadhi yao wamekuwa wakilalamikiwa kukiuka sheria hizo.

“Kikubwa ni kuwataka Madereva wa Serikali kuzingatia sheria na taratibu zinazohusiana na usalama barabarani. Tunawakaumbusha, tunawaelimisha kuhusiana na sheria hizo, taratibu na kanuni lakini pia kuwaonya baadhi yenu ambao hawazingatii sheria za usalama barabarani. Tunawakemea wale ambao kwa makusudi wanavunja sheria hizo”.

Aidha, Kamanda Katabazi ameongeza kuwa wana andaa utaratibu ambao utahusisha kuundwa makundi sogozi yatakayohusisha Viongozi wa Madereva wa Serikali katika kila Mkoa pamoja wasimamizi ambao ni Maafisa usalama barabarani  wa Mikoa husika.

Akizungumza baada ya kikao hicho, Mwenyekiti wa chama cha Madereva wa Serikali Bw. Issa Kisebengo amesema kuwa elimu waliyoipata kwenye kikao hicho imewasaidia kutambua majukumu na wajibu wao kwenye Utumishi wa Umma na kutoa wito kwa madereva wenzake.

“Sisi ni vioo kwa madereva wengine lakini pia tunabeba Watumishi wa Serikali, na kuna watumiaji wengine wa barabara,wote hao wanatutegemea sisi kwa usalama wao hivyo, mafunzo tuliyoyapata hapa, tusiyaache hapa hapa, tuyabebe, tuyatunze na twende tukayafanyie kazi”.

Licha ya kukumbushwa sheria, kanuni na taratibu za usalama barabarani, kikao hicho pia kiliambatana na mafunzo mbalimbali yaliyotolewa kwa madereva hao ili kuendelea kuwakumbusha kuhusu kuzingatia sheria hizo kwani kuwa madereva wa magari ya Serikali si kigezo cha kuvunja sheria, kanuni na taratibu zilizowekwa.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu