“MFUMO WA NEST UMEKUJA KUWALINDA WAFANYABIASHARA NA FEDHA ZA SERIKALI “- RC SE

Imetumwa : October 21st, 2024

 Na. Hellen M. Minja,    

       Habari – DODOMA RS

Wasimamizi wa miradi ya maendeleo hususan Shule, wametakiwa kusimamia na kukamilisha miradi kwa wakati kwa kutumia mfumo wa manunuzi Serikalini (NeST) kwani mfumo huo unawalinda wafanyabiashara kama unavyolinda fedha za Serikali.

Hayo yamebainishwa na Mkuu wa Mkoa wa Dodoma Mhe. Rosemary S. Senyamule, Oktoba 21, 2024 wakati wa ziara yake ya kikazi kukagua miradi ya madarasa, shule mpya na nyumba za walimu katika shule za Sekondari Mpunguzi, Matumbulu na Miyuji ‘B’.

Miradi ya shule hizo imeonekana kuwa nyuma ya wakati huku sababu zikitolewa kuwa ni changamoto zilizojitokeza kwenye matumizi ya mfumo wa NeST hivyo, Mhe. Senyamule alitoa ufafanuzi;

“Serikali imebadili mfumo, haijaongeza wala kubadili muda wa kutoa malipo. Mfumo huu ni mzuri huenda ni zaidi ya ule  mliokuwa mkikutana ana kwa ana na kukubaliana. Huu hauna kupunguziana gharama, mkishakua tayari kutumia mfumo vizuri, vitu vinakwenda haraka kuliko bila mfumo. Serikali imeingia kwenye mfumo huu ili kuwalinda kama inavyolinda fedha za Serikali” Mhe. Senyamule

Aidha, Mkuu wa Wilaya ya Dodoma Mjini Mhe. Jabir Shekimweri amewataka watendaji wa Kata kujikita kwenye usimamizi wa miradi hiyo ili ikamilike kwa wakati na kwa ubora, kwa kuhakikisha vifaa vinanunuliwa mapema na kuepuka visingizio vya kuelekeza nguvu kwenye uchaguzi wa Serikali za Mitaa.

Ziara hiyo ilianzia kwenye shule ya Sekondari ya Mpunguzi ambayo imetekeleza mradi wa ujenzi wa madarasa matatu na matundu nane (08) ya vyoo kwa kiasi cha shilingi 83,400,000/= fedha kutoka Serikali kuu na mradi huo umekamilika kwa asilimia 95.

Katika Mradi wa shule mpya ya Sekondari Kata ya Matumbulu iliyoanza kutokana na jitihada za wananchi na mapato ya ndani kiasi cha shilingi 28,000,000 na baadae kupitia mradi wa SEQUIP, Juni 23, 2024, shule ya Sekondari Mpunguzi ilipokea shilingi 544,225, 626.00 kwa ajili ya ujenzi wa shule hiyo

Mkuu wa Mkoa alihitimisha ziara yake kwa kutembelea mradi wa ujenzi wa Nyumba mbili za walimu, mabweni 2, matundu 10 ya vyoo na madarasa 4 katika shule ya Sekondari Miyuji B unaogharimu kiasi cha shilingi 454,000,000.00/= ambapo bado haujakamilika.

#kurayakosautiyako

#ujanjanikupigakura                

#dodomatukotayarikupigakura

#mtiwangubirthdayyangu