MKOA WA DODOMA WABAINISHA VIPAOMBELEE VYAKE 2024

Imetumwa : January 18th, 2024

Mkoa wa Dodoma umeweka wazi vipaombele vyake kwa mwaka 2024 ikiwa ni pamoja kuimarisha sekta ya kilimo inayochangia asilimia 40 ya pato la Mkoa huku sekta nyingine zikiwa Utalii, madini, Elimu, viwanda, usafirishaji pamoja na kuimarisha utoaji huduma kwa wananchi.

Hayo yamebainishwa leo Januari 18, 2024 na Mkuu wa Mkoa wa Dodoma Mhe. Rosemary Senyamule wakati akifungua kikao na viongozi wa dini wa Mkoa wa Dodoma wenye lengo la kushirikiana katika kufikia vipaombele hivyo.

"Rais wetu amefanya kazi kubwa na ya kipekee kwa kuwa anajali watu wa chini. Serikali imetoa kiasi cha jumla ya Shilingi Bilioni 95 kwa ajili ya kutekelezwa miradi mbalimbali ya Kilimo kwenye Halmashauri za Chamwino ambapo kuna miradi mitatu, Mpwapwa mradi 1 na Bahi mradi 1. Miradi hii Ina lengo la kuimarisha kilimo kiwe cha kisasa zaidi kwa kuwa cha umwagiliaji kwa mwaka mzima.

"Tunahitaji Dodoma iwe kitovu cha usafirishaji ili kuinua Uchumi kwa haraka na kuwa Mji wa kimkakati kwani hali ya Uchumi bado si ya kuridhisha. Kwenye Utalii, tuna vivutio vingi sana na tunahitaji Sasa wawekezaji wakubwa kwa ajili ya kujenga Hoteli zenye hadhi ya nyota 5 ambazo zitawezesha kupokea wageni wenye hadhi kubwa kutoka mataifa tofauti tofauti." Ameeleza Mhe. Senyamule

Akiwasilisha taarifa ya Elimu kwa Mkoa wa Dodoma, Afisa Taaluma Mkoa Mwl. Justin Machela amesema Mkoa wa Dodoma umejiwekea Mkakati wa Elimu 2024 wenye lengo la kuinua ufaulu wa Mkoa.

"Mkakati wa Elimu Mkoa umejikita katika kuhakikisha wanafunzi wanapata chakula shuleni kwani hii itasaidia kutokomeza utoro na kuimarisha mahudhurio kwa wanafunzi. Kwenye matokeo ya mitihani ya Taifa tumedhamiria yafanane na hadhi ya makao makuu ya nchi. Elimu ya msingi ufaulu ufikie asilimia 95, kidato cha 4 ufikie asilimia 65 kwa kupata madaraja ya I -111 huku kidato cha 6 yafikie asilimia 100 kwa ufaulu wa madaraja 1-11 tu.

"Aidha, mahudhurio ya wanafunzi wapya kwa muhula wa 2024 ambapo kwa madarasa ya awali waliandikishwa wanafunzi 64,707 walioripoti ni 54,060 sawa na asilimia 63.5, darasa la kwanza waliandikishwa ni 79,099 walioripoti ni 65,765 sawa na asilimia 56.92 hivyo mahudhurio yanaridhisha " Amesema Mwl. Machela.