MKOA WA DODOMA WAJINOA KUIBUA WAGONJWA 1,930 WA KIFUA KIKUU

Imetumwa : January 16th, 2025

Na. Hellen M. Minja,

       Habari – DODOMA RS

Kufuatia uzinduzi wa Mpango harakishi wa  kuibua wagonjwa wa Kifua kikuu katika Halmashauri 76 za Mikoa 9 nchini uliozinduliwa na Waziri wa Afya Mhe. Jenista Mhagama Januari 06, Mkoa wa Dodoma umeanza maandalizi ya zoezi la kuibua wagonjwa 1,930 waliokosekana mwaka 2024 kwa kufanya mafunzo ya siku tatu kwa wataalamu wanaoshughulika na huduma za ugonjwa huo kwa ngazi zote.

Mafunzo hayo ya siku tatu ambayo leo Januari 16, 2025 yamefanyika kwenye ukumbi wa Hoteli ya Golden Crown Jijini Dodoma, yameongozwa na Mratibu wa Huduma za Kifua Kikuu kutoka Ofisi ya Mkuu wa Mkoa wa Dodoma Dr. Peres Lukango.

“Lengo ni kutafuta wagonjwa 1,930 waliokosekana mwaka 2024, Mkoa unafanya maandalizi ya zoezi hilo litakaloanza tarehe 20, mafunzo tunayoyafanya leo ni sehemu ya kuandaa wataalam watakaohusika na zoezi hilo. Baada ya mafunzo haya tutakua na zoezi la kukamilisha vitendea kazi kwa kila Halmashauri zitakazohusika na zoezi” Dr. Lukango.

Miongoni mwa wadau wanaosimamia mafunzo na zoezi zima ni Naibu Meneja Mpango wa Kifua Kikuu na Ukoma kutoka Wizara ya Afya Dr. Liberate Mlech ambaye amewaambia washiriki kuwa mafunzo na nyenzo watakazozipata hapo zitafanikisha lengo la kuwapata wagonjwa hao kama ilivyokusudiwa kwani hii ni vita na nyezo hizo ndio silaha.

Kwa upande mwingine, Mshauri wa zoezi la kuibua wagonjwa wa Kifua Kikuu Dr. Deus Kamara, amesema hii ni kampeni ya tofauti kwani inahusisha kutafuta wagonjwa ambao hawaonekani. Inahitajika mikakati ya kikamilifu ili kutafuta mtu ambaye haonekani hivyo, Serikali ina dhamira kubwa ya kuhakikisha kwamba hili linatendeka.

Wataalamu wanaopatiwa mafunzo ni wale wa kutoa dawa za wagonjwa wa Kifua Kikuu, wahudumu ngazi ya jamii na wataalamu wa takwimu. Zoezi hilo litafanyika kwenye Halmashauri 7 kati ya 8 za Mkoa wa Dodoma ambazo ni Dodoma Jiji, Chamwino, Bahi, Kondoa Mji, Kondoa DC, Mpwapwa na Kongwa. Chemba haitahusika na zoezi hilo kutokana na takwimu kuonesha kuwa inafanya vizuri katika uibuaji wa wagonjwa.

#dodomafahariyawatanzania

#keroyakowajibuwangu                               #mtiwangubirthdayyangu