MMMAM DODOMA WAFANYA TATHMINI YA UTEKELEZAJI ROBO YA PILI 2024

Imetumwa : January 24th, 2025

Na. Hellen M. Minja,

       Habari – DODOMA RS

Maafisa lishe na Ustawi wa Jamii Mkoa wa Dodoma, wamekutana leo Januari 24, 2025 kwenye ukumbi wa jengo la CCT Jijini Dodoma katika kikao kazi cha kufanya tathmini ya utekelezaji wa Mpango wa Malezi na Makuzi ya Mtoto (MMMAM) kipindi cha robo ya pili ya mwaka 2024, unaotekelezwa katika Halmashauri zote nane za Mkoa huu.

Akifungua kikao kazi hicho kwa niaba ya Mganga Mkuu wa Mkoa wa Dodoma, Afisa Afya upande wa Mazingira kutoka Ofisi ya Mkuu wa Mkoa Seksheni ya Afya Bw. Nelson Rumbeli, amesema;

“Tunataka tutafsiri ni mikakati ipi imefanya vizuri kwenye Halmashauri fulani kuhusiana na huu utekelezaji. Tunahitaji tujiulize ni kwa jinsi gani imefanyika vizuri, imetekelezwa vipi na imefanya vizuri kwenye kundi gani. Nia hasa ni kuboresha na kuainisha changamoto tulizokutana nazo wakati wa utekelezaji wa Mpango huu”

Kadhalika, Diwani wa Halmashauri ya Chemba Mhe. Mwanaharusi Bakari Bato, amezungumzia suala la ushirikishwaji haba wa wadau kwenye mafunzo ya lishe yanapofanyika kwenye Halmashauri.

“NGO’s zilizopo kwenye Halmashauri zishirikishe ma-championi, sisi huwa tunatoa elimu bila kupata chochote, na tutaibua mengi ambayo yatakua faida kwenu. Mnapoleta taarifa zenu zinaboreka pia kuwashirikisha wahudumu wa afya kwenye mambo haya ya makuzi na malezi ni vizuri zaidi kwani watakwenda kuitoa kwa jamii”. Mhe. Bato

Aidha, Afisa Ustawi wa jamii Mkoa wa Dodoma Bi. Amina Mafita, amezungumzia ubainishaji wa awali wa watoto wenye ulemavu na kusema, anatamani kufahamu zoezi hilo limefikia hatua gani kwa sababu kuna vitengo maalumu ikiwemo shule jumuishi ambazo zina watoto hao hivyo nguvu kubwa inatakiwa kuelekezwa kwenye kuwabaini ili wapatiwe huduma muhimu.

Kikao hicho kilifungwa kwa kufikia maazimio mawili ambayo ni ufuatiliaji wa matukio ya ukeketaji kwa watoto wa kike yanayofanyika katika Halmashauri ya Chemba pamoja na kushirikisha makundi mengine ya wadau katika utendaji kazi ikiwemo ma-championi, viongozi wa dini na watu maarufu waliopo kwenye jamii zetu kwani wanachochea ustawi wa jamii.  

#dodomafahariyawatanzania

#keroyakowajibuwangu                               #mtiwangubirthdayyangu