PROF. MWAMFUPE: MAONESHO YA NANE NANE YAWASAIDIE WAKULIMA NA WAFUGAJI WETU KUONGEZA TIJA KATIKA SHUGHULI ZAO ZA UZALISHAJI

Imetumwa : August 6th, 2017

Mstahiki Meya wa Manispaa ya Dodoma Mheshimiwa Profesa Davis Mwamfupe amesema bado Maonesho ya Kilimo na Mifugo (Nane Nane) Kanda ya Kati hayajafanikiwa kuwasaidia wakulima, wafugaji na wavuvi wetu kwa kiasi kinachoridhisha kuwawezesha kubadili shughuli zao na kuzifanya kuwa na tija inayoridhisha.

Amesema Maonesho ya Nane Nane yamekuwepo kwa miaka mingi maeneo mbalimbali ya nchi katika Kanda mbalimbali na ukiyatembelea utakutana na vitu vya kuvutia sana hususani Teknolojia na mbinu bora za uzalishaji kilimo na mifugo ambazo zinauwezo wa kuleta tija kubwa lakini bado changamoto kubwa mambo yote bora na mazuri yanayopatikana kwenye Maonesho bado hayajaweza kumfikia mkulima kwenye ngazi za msingi, akitoa mfano kuwa unaweza kutoka umbali usiozidi kilomita mbili (2) kutoka kituo (Uwanja) cha Maoneshocha Nzuguni kilipo utashangaa kukuta mkulima analima kilimo cha kienyeji ambacho hakina manufaa.

Profesa Mwamfupe aliyasema hayo Agosti 6, 2017 wakati alipofanya ziara kutembelea Maonesho ya Nane Nane Kanda ya Kati yanayoendelea kufanyika kwenye viwanja vya Maonesho vya Nzuguni nje kidogo ya Mji wa Dodoma.

“Teknolojia inayooneshwa kwenye Maonesho haya bado haijaweza kuwafikia wakulima na wafugaji wetu kwenye vijiji vyao wanapoendeshea shughuli zao za kilimo na mifugo” alisema Profesa Mwamfupe. Aliongeza kuwa bado teknolojia na ubunifu unaopatikana kwenye Maonesho haya unahitaji kuwafikia wakulima wa chini kabisa.

Alitoa wito kwa Mamlaka zinazohusika kuhakikisha Kiwanja cha Maonesho ya Nane Nane Kanda ya Kati Nzuguni kinakuwa kituo cha Shamba Darasa la kilimo mifugo na uvuvi cha kudumu na wakati wote wataalamu wa kilimo na mifugo wawepo kituoni hapo kipindi chote cha mwaka wakisimamia shughuli za kilimo na mifugo kituoni hapo na Halmashauri za Wilaya zilete Wakulima na Wafugaji wao kujifunza na kupata suluhisho la changamoto zinazowakabili katika shughuli zao za uzalishaji .

Amezitaka sasa Halmashauri za Wilaya Kanda ya kati kwa kushirikiana na wadau mbalimbali wanaounga mkono shughuli za kilimo, mifugo na uvuvi waone namna wanavyoweza kuifikisha kwa wakulima na wafugaji wetu elimu inayopatikana kwenye Uwanja wa Maonesho Nzuguni. Aidha, amewataka wananchi wa Mikoa ya Dodoma na Singida hususani wakulima, wafugaji na wavuvi kutembelea Maonesho hayo kwa wingi kwa kuwa mambo mazuri yakujifunza yapo mengi kubwa likiwa jinsi Teknolojia na mbinu bora za kuongeza tija ya uzalishaji mazao ya kilimo na mifugo.