‘PUMA ENERGY TANZANIA’ WAKABIDHI MITUNGI 100 DODOMA KUUNGA MKONO MATUMIZI YA NISHATI SAFI

Imetumwa : June 3rd, 2025

Na: Hellen M. Minja

       Habari - DODOMA RS

Katika kuunga mkono juhudi za kuhamasisha matumizi ya nishati safi zilizoasisiwa na Rais Mhe. Dkt. Samia Suluhu Hassan , Kampuni ya nishati ya Puma Energy Tanzania imekabidhi mitungi 100 ya gesi kwa Mkuu wa Mkoa wa Dodoma Mhe. Rosemary Senyamule ambaye ameigawa kwa wananchi katika maadhimisho ya ‘Samia Day’ yaliyofanyika leo Juni 03, 2025 katika Kata zote 209 za Mkoa wa Dodoma.

Akipokea Mitungi hiyo katika hafla fupi iliyoandaliwa kwenye viwanja vya ofisi yake Jijini humu, Mhe. Senyamule amesema;

“Ajenda moja mahsusi ambayo tumeiweka ni kuhakikisha tunaongea na kuhamasisha juu ya matumizi ya nishati safi ambayo Mhe. Rais mwenyewe ameiasisi katika nchi yetu lakini amepewa kuwa ‘Champion wa Afrika’. Nishukuru Puma Gas kwa sababu mmeifanya ajenda hiyo imepata nguvu kubwa siku ya leo kwani pamoja na kuelezea, kushawishi na kuhamasisha, pia tutagawa mitungi ya gesi kwa ‘sytle’ tutakayokubaliana”

Awali, akizungumza kabla ya makabidhiano hayo, Katibu Tawala Mkoa wa Dodoma Bw. Kaspar K. Mmuya amesema Mhe. Dkt. Samia Suluhu Hassan amefanya mengi ikiwemo ushiriki wake na wadau mbalimbali ambapo akiwa kinara wa mazingira, alihamasisha matumizi ya nishati safi hivyo Mkuu wa Mkoa ameungana na wananchi wa Dodoma kuidhihirishia Dunia na Tanzania kuwa Dkt. Samia amefanya makubwa ndani ya Mkoa wa Dodoma

Kwa upande wake  Mwakilishi wa Puma Energy Tanzania Bw. Jeff Nasser ambaye amemuwakilisha Mkurugenzi Mkuu wa Kampuni hiyo, amesema Kampuni yake inaunga mkono juhudi za Serikali katika kuhakikisha Watanzania wanatoka kwenye matumizi ya nishati isiyo salama na kwenda kutumia nishati safi, na wataendelea kushirikiana na Serikali kuhakikisha wanaleta mabadiliko hayo nchi nzima.

#samiaday2025dodomatumetekeleza