RAIS DKT. SAMIA KUFANYA ZIARA JIJINI DODOMA

Imetumwa : June 13th, 2025

Na. Hellen M. Minja

       Habari – DODOMA RS

Rais wa Jamhuri ya Muungano wa Tanzania Mheshimiwa Daktari Samia Suluhu Hassan anatarajiwa kufanya ziara Jijini Dodoma Juni 14, 2025, ambapo atatembelea miradi mikubwa ya kimkakati ikiwa ni pamoja na ujenzi wa Kiwanja cha ndege cha Kimataifa cha  Msalato  kilichokadiriwa kugharimu kiasi cha shilingi za Kitanzania bilioni 359 pamoja na barabara ya mzunguko wa nje shilingi bilioni 221.

Akiutangazia Umma kuhusu ziara hiyo katika Mkutano wake na Waandishi wa Habari uliofanyika kwenye ukumbi wa Ofisi ya Mkuu wa Mkoa Jijini hapa, Juni 13, 2025, Mkuu wa Mkoa wa Dodoma Mhe. Rosemary Senyamule amesema;

“Katika ziara hiyo, Mhe. Rais ataambatana na Rais wa Benki ya Maendeleo ya Afrika Mhe. Dkt. Akinwumi A. Adesina ambapo atakagua mradi wa ujenzi wa Kiwanja cha Ndege cha Msalato na ujenzi wa barabara ya mzunguko wa nje kipande cha kuanzia Mtumba-Veyula hadi Nala”.

Aidha, Mhe. Senyamule ameongeza kuwa, ziara hiyo itahitimishwa katika eneo la Nala ambapo  Mhe. Rais atahutubia wananchi wa Dodoma hivyo amewataka kutumia fursa hiyo muhimu, kuonesha shukrani kwa Mhe. Rais ambaye amefanya mambo makubwa kwenye Mkoani huu.

Katika kipindi cha uongozi wake wa miaka minne tangu kuingia madarakani, Mkoa wa Dodoma peke yake umepatiwa miradi 3,093 yenye thamani ya zaidi ya shilingi trilioni 10. Hiki ni kiasi kikubwa cha fedha kuwahi kutumika kutekeleza miradi kwa Mkoa wa Dodoma.

Ukamilishaji wa Miradi ya kimkakati inayoendelea kutekelezwa katika Jiji la Dodoma, unatarajiwa kulipa hadhi Jiji hili ambalo ndio sura ya Makao Makuu ya nchi ya Tanzania,kadhalika kusaidia kuinua uchumi wa Wakazi wake kupitia fursa mbalimbali zitakazotokana na miradi hiyo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu