RC SENYAMULE AKABIDHI MAGARI KWA WAKUU WA WILAYA ZA BAHI;CHAMWINO.NA KONGWA

Imetumwa : March 24th, 2025

Na. Hellen M. Minja,

       Habari – DODOMA RS

Serikali ya awamu ya Sita chini ya Rais Mhe. Dkt. Samia Suluhu Hassan, imetoa magari matatu mapya kwa Wakuu wa Wilaya za Bahi, Chamwino na Kongwa ambayo yatawawezesha kutekeleza majukumu yao kwa urahisi ikiwemo kuwafikia Wananchi, kusikiliza na kutatua kero zao.

Akikabidhi magari hayo kwa Viongozi hao wa Wilaya, Machi 24, 2025, Mkuu wa Mkoa wa Dodoma Mhe. Rosemary Senyamule amesema;

“Mhe. Rais ametoa uzito kwa majukumu makubwa ambayo Wakuu wa Wilaya wanayafanya, na kwa kujali pia Watanzania ili waweze kuhudumiwa. Ametoa tena magari haya matatu ya kisasa kabisa ambayo yatawafanya Viongozi hawa kuwakimbilia Wananchi kwa haraka zaidi kwani kazi zao ni za dharura na zinataka vitendea kazi imara na vya uhakika”

Aidha, Katibu Tawala Mkoa wa Dodoma Bw. Kaspar K. Mmuya, amesema Mhe. Rais katika bajeti ya 2024/2025, aliridhia kuendelea kununua magari kwa Wakuu wa Wilaya waliohitaji, hivyo Wakuu wa Wilaya watatu walipata magari mapya na mwaka huu Wakuu wa wilaya wanne watapata magari mapya.

Akizungumza kwa niaba ya Wakuu wa Wilaya waliopokea magari hayo, Mkuu wa Wilaya ya Kongwa Mhe. Mayeka S. Mayeka, amemshukuru Mhe. Rais Samia kwa namna ambavyo ameitendea Wilaya yake kwa kuipatia gari jipya na amemuahidi kulitumia kwa kuwahudumia Wananchi wake kwani ataweza kuvifikia vijijiji vyote 87 na vitongoji 385 kusikiliza na kutatua kero zao.

Kadhalika, Mwenyekiti wa Halmashauri ya Bahi na MNEC  Bw. Donald Mejitii, amemshukuru Mhe. Rais kwa kuleta usafiri kwa Wakuu wa Wilaya kwani wao ndio wanaosimamia maendeleo na usalama kwenye Wilaya na wanamsaidia Mhe. Rais kwenye maeneo yao hivyo kwa usafiri huo, wanakwenda kutekeleza kasi ya ilani, usimamizi wa usalama na utulivu.

#dodomafahariyawatanzania

#keroyakowajibuwangu#mtiwangubirthdayyangu