RC SENYAMULE AMWAGIZA MKANDARASI KUJIELEZA OFISINI KWAKE

Imetumwa : February 16th, 2023

RC SENYAMULE AMWAGIZA MKANDARASI KUJIELEZA OFISINI KWAKE

Mkuu wa Mkoa wa Dodoma Mhe. Rosemary Senyamule, amemuagiza Mkandarasi aliyepewa Zabuni ya ujenzi wa Ofisi ya Mkuu wa Wilaya ya Dodoma katika eneo la Njedengwa kufika ofisini kwake siku ya Jumatatu asubuhi Februari 20, kujieleza kwa nini mpaka sasa mradi huo haupo kwenye hatua inayoridhisha ya umaliziaji kulingana na Mkataba aliopatiwa na Serikali wa kukamilisha ujenzi huo Mwezi Aprili 2023.

Mhe. Senyamule ametoa agizo hilo wakati alipofanya ukagua wa ujenzi huo unaoendelea akiwa ameongoza na Mkuu wa Wilaya ya Dodoma Mhe. Jabir Shekimweri, Kamati Kuu ya ulinzi na usalama ya Mkoa pamoja na viongozi wa idara mbalimbali za Mkoa.

“Nataka Mkandarasi aje mwenyewe na asitume mwakilishi mana huku ni kuchezea miradi ya Serikali mana mradi upo nyuma kwa kiasi kikubwa na naona hapa mutaandika barua ya kuomba kuongezewa muda bila sababu ya msingi. Lengo la Serikali kutoa fedha hizi ni wananchi waweze kupata huduma kwa haraka lakini ninavyoona hapa hakuna dalili ya mradi huu kukamilika mwezi Nne” Ameagiza Mhe. Senyamule

Ujenzi huo unaogharimu kiasi cha Shilingi Bilioni 1.753 pamoja na VAT, utekelezaji wake mpaka sasa umefikia asilimia 42 na unahusisha ofisi, uzio, kibanda cha mlinzi, ukumbi wa mikutano, Tehama, mfumo wa zima moto pia njia ya kupita watu wenye ulemavu. Kukamilika kwa Mradi huo kutasaidia wananchi wengi kupata huduma kwa wingi na kwa urahisi tofauti na sasa ambapo wanapata huduma kwenye eneo dogo lisilokidhi mahitaji ya wananchi wengi wanaohitaji huduma kwenye ofisi hiyo.