RC SENYAMULE AWATAKA WASHIRIKI WA MAFUNZO YA ITIFAKI YA DIPLOMASIA NA USTAARABU KUWA CHACHU KWA WENGINE

Imetumwa : January 26th, 2025

Na Sofia Remmi.

Dodoma-Habari Rs

Mkuu wa Mkoa wa Dodoma,Rosemary Senyamule amewataka Washiriki wa Mafunzo ya Itifaki ya Diplomasia na ustaarabu kupeleka elimu waliyoupata kwa wengine,na kwamba kwa kufanya hivyo elimu hiyo itakuwa na manufaa,kwani itawafanya watu wengi kubadilika.

Mhe. Senyamule ameyasema hayo leo Januari 26,2025 wakati akifunga mafunzo hayo yaliyodumu kwa siku tatu ambayo yameandaliwa na Taasisi ya Protocal Service Team ambapo jumla ya washiriki 110 kutoka katika mikoa 19 wamepata mafunzo.

"Nimefurahi kuona kundi hili kubwa linakwenda kuwa chachu kwa wengine.Nilikuwa nimekaa hapa natafakari hivi hawa watu 110,kila mmoja akienda kutoa elimu hii kwa watu 10 tu,maana yake elimu hii itakuwa imewafikia watu 1,100,hao si watu wachache,bali ni wengi sana".

Sambamba na kuwataka Washiriki hao kupeleka elimu hiyo kwa wengine,Mhe Senyamule amewataka  kuifanyia kazi  kwa wao wenyewe kubadilika.

" Kubadilika kunataka dhamira ya dhati ya kuchukua hatua,maadam mmejifunza,maneno yenu,matendo yenu yaoneshe kwamba ninyi ni watu wapya.

Tunayo kazi ya kufanya sisi wenyewe ambao tumepata mafunzo kuchukua hatua ya kubadilika.Lakini tunayo kazi kubwa ya kupeleka elimu hii kwa watu wengine,tusibaki nayo wenyewe.Watu wanafikiri kwamba ustaarabu unatokea tu,ustaarabu mtu anafundishwa.Amesema Mhe. Senyamule.

Kadhalika Mhe Senyamule amesema amefurahi kwamba Washiriki hao wamejifunza  Itifaki ya Mwenge wa Uhuru kwani watakuwa wameelewa maana na umuhimu wa Mwenge wa Uhuru,na kwamba watawaelimisha na wengine.

"Hapa kwenye  kujifunza kuhusu Mwenge kilichonifurahisha, ninyi sasa mmeshajua nini maana ya Mwenge wa Uhuru.Watanzania wengi hawajui,wengine wanasema Mwenge hauna sababu,ukawekwe makumbusho,lakini ninyi mtatusaidia kusema,kwa sababu mmeelewa," Mhe. Senyamule

Kwa upande wake,Mkurugenzi wa Taasisi ya 'Protocal and Services Team' (PST) Hussein Abubakari amesema wamepata mafanikio makubwa kwani mafunzo ya awamu hii yamekuwa na washiriki wengi tofauti na awamu iliyopita,huku  akiahidi kuwa taasisi yake itaendelea  kuratibu mafunzo hayo ili watu wengi zaidi wapate nafasi ya kujifunza.

Sambamba na kueleza mafanikio, Mkurugenzi huyo ameshukuru kwa ushirikiano ambao PST wamekuwa wakiupata kutoka kwenye ofisi ya Mkuu wa Mkoa.

Naye,Mkufunzi Mkuu  wa mafunzo hayo ambaye pia ni Mhadhiri wa Chuo cha Diplomasia cha Dkt. Salim Ahmed Salim, Dkt. Godwin Amani Gonde amesema kuwa washiriki hao wamejifunza dhana ya  Mwenge,Itifaki ya Mwenge, maana ya itifaki ,umuhimu wa itifaki katika maeneo ya kazi,Sheria za itifaki,Itifaki ya Mawasiliano,namna ya kuzungumza kama Watumishi wa Umma,Uvaaji,namna ya kula pamoja na falsafa ya utu na Utanzania.

Kwa upande wake mmoja wa washiriki wa mafunzo hayo,Mchungaji Kelvin Mlingo amesema elimu waliyoipata watakwenda kuifanyia kazi kwa vitendo.

#dodomafahariyawatanzania

#keroyakowajibuwangu

#mtiwangubirthdayyangu