SKAUTI MKOA WA DODOMA WAASWA KUANZISHA PROGRAMU ZA KUVUTIA VIJANA KUJIUNGA

Imetumwa : October 4th, 2025

Na. Hellen M. Minja

       Habari – DODOMA RS

Wito umetolewa kwa Chama cha Skauti Mkoa wa Dodoma kuhakikisha wanachama wake wanabuni programu za kuvutia vijana wengi kujiunga na Chama hicho ili kuimarisha vizazi vijavyo vyenye maadili, kujitegemea, kujitolea na kushiriki shughuli mbalimbali za jamii.

Mwenyekiti wa Bodi ya Wakurugenzi Decca Medics Limited Dr. Gustavus Deusdedit, ameyasema hayo alipokua Mgeni rasmi kwenye Mkutano Mkuu wa Chama cha Skauti Mkoa wa Dodoma kilichofanyika kwenye ukumbi wa Ofisi ya Mkuu wa Mkoa, Jengo la Mkapa Jijini hapa.

“Skauti hufundisha vijana ujasiri na Moyo wa kujitolea kushiriki shughuli mbalimbali za jamii ili kukuza Viongozi wa kesho wenye maono na waadilifu hivyo, nitoe wito kwenu kuhakikisha mnabuni programu za kuvutia vijana wengi kujiunga na Skauti ili kuimarisha vizazi vijavyo kwani ni wajibu wenu kuwalea vijana wa kesho kuwa wenye maadili mema.”

Aidha, Kamishna wa Skauti Mkoa wa Dodoma ALT Salama Katunda, amesema Mkutano huo ngazi ya Mkoa ndio chombo cha juu cha kiutawala na maamuzi kuhusiana na yote yanayokwenda kutendeka katika ngazi ya Mkoa na unahusisha wajumbe  watakaoridhia taarifa ya utendaji pamoja na kuazimia Mikakati ya Skauti kwa mwaka 2026.

Akisoma risala ya Chama hicho, Bw. Paul Makubi amesema Chama kimeimarisha uhusiano na wadau mbalimbali ambao wanashirikiana katika malezi ya vijana kwa kufanya semina za kujengeana uwezo ambapo baadhi ya wadau hao ni pamoja na Ofisi ya Mkuu wa Mkoa wa Dodoma, Ofisi za Halmashauri, Polisi Zimamoto, 'Red cross na  Taasisi za Kidini.

Chama cha Skauti ni Taasisi ya malezi ya Vijana inayotambulika ulimwenguni ambapo ilianzishwa mwaka 1905 na iliingia Tanzania mwaka 1907 ikiwa na lengo la kuwalea Vijana kimwili, kiroho na kiakili ili wawe shupavu, wakakamavu na wenye manufaa kwenye jamii kwa kuimarisha nidhamu miongoni mwao.

#DodomaFahariyaWatanzania

#KuraYakoHakiYakoJitokezeKupigakura

#NimejiandikishaNitapigaKura

#UmejiandikishaKapigeKura