STAMICO WAKABIDHI MAKONTENA MAWILI YA MKAA SAFI KWA KIKUNDI CHA WANAWAKE NA SAMIA

Imetumwa : June 24th, 2025

Na. Hellen M. Minja

      Habari - DODOMA RS

Mkoa wa Dodoma unaendelea na jitihada za kutunza mazingira kwa kuhamasisha matumizi ya nishati safi ya kupikia ikiwa ni katika kutekeleza maelekezo ya Mhe. Rais Dkt. Samia Suluhu Hassan,  ambapo kwa ufadhili wa Shirika la Madini Nchini (STAMICO), kikundi cha Wanawake na Samia Mkoani hapa kimepokea Makontena mawili yatakayotumika kama Maduka au stoo kwa ajili ya Mkaa safi wa kupikia.

Hafla ya kuzindua na kupokea Makontena hayo ambayo ndani yake yalikua na magunia ya Mkaa safi uliopewa jina la 'Rafiki Briquettes', imefanyika, mgeni rasmi akiwa ni Mkuu wa Mkoa wa Dodoma Mhe. Rosemary Senyamule mnamo Juni 23, 2025 katika eneo la Sabasaba ambapo Kontena moja litapatikana hapo na jingine litapatikana  Nzuguni Jijini hapa.

"Umeponya macho na vifua vya hawa Wanawake ambao sasa wanatumia nishati safi kupikia, lakini pia tungekua na nafasi ya kwenda porini, ungeona ni kwa kiasi gani umeokoa mazingira ya Nchi Yetu ambayo yanatusaidia kupata hewa safi, mvua na faida nyingine lukuki zinazoletwa na utunzaji wa mazingira". Amesema Mhe. Senyamule.

Kwa upande wake  Mkurugenzi wa STAMICO Dkt. Venance Mwasse, amesema Shirika lake lina dhamira ya dhati kuichukua ajenda ya Mhe. Rais Samia na kuipeleka mbele mpaka kufikia malengo aliyojiwekea ya kwamba ifikapo mwaka 2034, asilimia 84 ya Watanzania wawe wamehama kutoka kwenye matumizi ya nishati chafu na kuhamia kwenye matumizi ya nishati safi ya kupikia.

Akizungumza kwa niaba ya kikundi hicho, Mwenyekiti wa Wanawake na Samia Mkoa wa Dodoma Bi. Fatma Madidi, amemshukuru Mkurugenzi huyo kwa kuona uhitaji wa kundi hilo kuwezeshwa kupitia biashara ya nishati safi ya Mkaa wa kupikia kwani ameinua maisha ya Wanawake hao kiuchumi kwa kiasi kikubwa.

Kikundi cha Wanawake na Samia kilipewa uwakala wa uuzaji na usambazaji wa Mkaa huo na Rais Mhe. Dkt. Samia Suluhu Hassan mwaka 2023 ,ambapo Shirika la STAMICO liliahidi kuwaletea Kontena sambamba na Mkaa huo unaotengenezwa kwa kutumia Makaa ya mawe, hatimaye ahadi hiyo imetimia. Makontena hayo yapo 26, yanatarajiwa kusambazwa kwa vikundi hivyo nchi nzima.

#dodomafahariyawatanzania

#keroyakowajibuwangu

#wekezadodomastawishadodoma

#mtiwangubirthdayyangu