TBL KUJENGA KIWANDA KIPYA CHA BIA MKOANI DODOMA

Imetumwa : March 19th, 2018

Kampuni ya Bia Tanzania (TBL) inatarajia kujenga kiwanda kingine cha kuzalisha bia Mkoani Dodoma Makao Makuu ya Nchi ambapo Dola za Marekani Milioni 100 zimetengwa kufanikisha uwekezaji huo.

Hayo yamebainika mapema wiki hii wakati wa mazungumzo baina ya Rais wa Jamhuri ya Muungano wa Tanzania Mhe. Dkt. John Pombe Magufuli na Rais wa Kanda ya Afrika wa Kampuni ya vinywaji ya AB-INBEV inayomiliki asilimia 57.5 ya hisa za kampuni ya bia Tanzania (TBL) Bw. Ricardo Tadeu yaliyofanyika Ikulu Jijini Dar es Salaam.

Bw. Ricardo amethibitisha kuwa uwekezaji wa kiwanda hiko kipya Mkoani Dodoma unakuja kufuatia kuendelea kukua kwa uzalishaji wa TBL kuanzia mwaka 2015 hadi sasa.

“Uwekezaji wa Kiwanda hiko kipya mkoani Dodoma utaongeza ajira kupitia kwa wakulima wanaozalisha mazao ya ngano, Mtama na Mahindi ambayo hutumika kutengenezea vinywaji” alibainisha Bw. Recardo.

Kwa upande wake Rais Magufuli amemhakikishia Bw. Recardo Tadeu kuwa Serikali itaendelea kushirikiana na TBL na amempongeza kwa uamuzi wake wa kujenga kiwanda cha kuzalisha bia Mkoani Dodoma kitakachoungana na viwanda vingine vilivyopo Dar es Salaam, Mbeya, Mwanza na Arusha.

Mhe. Rais Magufuli ameongeza kuwa Serikali inachukua hatua madhubuti kuvilinda viwanda vya bia na ametoa wito kwa kampuni hiyo na wawekezaji wengine kuendelea kuwekeza hapa nchini kutokana na uwepo wa fursa kubwa ya soko la ndani, Afrika Mashariki na Jumuiya ya Maendeleo Kusini mwa Afrika (SADC).