TIMU YA UMITASHUMTA 2025 MKOA WA DODOMA YASISITIZWA NIDHAMU,UPENDO NA KUJITUMA

Imetumwa : May 30th, 2025

Na. Hellen M. Minja

       Habari – DODOMA RS

Wawakilishi wa timu ya Mkoa wa Dodoma kwenye Umoja wa Michezo kwa Shule za Msingi Tanzania (UMITASHUMTA) 2025 inayotarajiwa kufanyika Mkoani Iringa, wametakiwa kuliheshimisha jina la Mkoa kwa kuwa na nidhamu, kupendana na kujituma ili kuhakikisha makombe yote yanarudi Dodoma.

Kaimu Katibu Tawala Msaidizi Seksheni ya Elimu na Mafunzo ya Ufundi Mkoa wa Dodoma ambaye ni Afisa Elimu Taaluma Mwalimu Justin Machela, ameyasema hayo Mei 30, 2025 wakati wa hafla fupi ya kutangaza timu ya Mkoa itakayowakilisha kwenye mashindano hayo Kitaifa Mkoani Iringa iliyofanyika katika  Shule ya Sekondari Dodoma.

“Makombe yanapatikana kwa namna tatu, kujituma sana uwanjani, nidhamu na kupendana ninyi kwa ninyi. Mkuu wa Mkoa anatamani kila tunaposhindana Dodoma tuwe wa kwanza kwa vigezo na viwango vya hali ya juu. Waalimu ambao tunakwenda na watoto, kazi yetu ni kuwasimamia na kuendelea kuwafundisha, kuhakikisha nidhamu ya watoto inakua juu na ya yetu pia inakua juu”.

Kadhalika, Umoja wa Walimu Wakuu Tanzania (TAPSHA) ukiongozwa na Mwenyekiti wake Mwalimu James E. Manary, wameunga mkono juhudi za kuwawezesha watoto hao kukaa kambini kwa kipindi ambacho wanasubiri safari ya kuelekea Iringa kwa kutoa vyakula na fedha taslimu.

“Sisi vijana wa TAPSHA, tunakabidhi vitu vyenye thamnai ya shilingi 3,380,000 ambavyo ni vyakula, jezi za ‘football’ 22, jezi za ‘netball’ 10 lakini pia ‘tracksuit’ ambazo tumezitoa kama motisha kwa mtoto atakayefanya vizuri pia tunatoa fedha taslimu shilingi 730,000 ambazo 600,000 kwa ajili ya nyama na 130,000 ya vitafunwa”.

Katika hatua nyingine,Afisa elimu awali na msingi Halmashauri ya Wilaya ya Chemba Mwl. Josephat Ambilikile, amezungumzia siri ya mafanikio ya Chemba kwani wamebeba vikombe vingi sambamba na kuibuka washindi wa jumla kwenye mashindano hayo ngazi ya Mkoa ambapo amesema ni ushirikiano mkubwa ulipo katika idara ya elimu Msingi na jitihada za Walimu shuleni.

Mashindano ya kutafuta timu ya Mkoa kwa ajili ya kushiriki UMITASHUMTA 2025, yameshirikisha  wanafunzi  960 kutoka shule za msingi za Halmashauri zote 8 za Mkoa wa Dodoma ambapo mchujo ulifanyika na kupatikana wanafunzi 120 kwenye timu hiyo ya michezo mbalimbali ambao watakaa kambini hapo kwa siku 6 kabla ya kuelekea Mkoani Iringa.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu