Upandaji Miti Shule ya Msingi na Sekondari Mvumi Makulu

Imetumwa : June 5th, 2022

Ofisi ya Mkuu wa Mkoa wa Dodoma inaendelea na zoezi la upandaji Miti katika maeneo tofauti tofauti kuelekea kilele cha siku ya Mazingira Duniani June 05 ambapo siku ya tarehe 04 June, zoezi hilo lilifanyika katika shule ya msingi na sekondari Mvumi Makulu inayopatikana katika Wilaya ya Chamwino.Katika zoezi hilo, Mkuu wa Mkoa wa Dodoma Mhe. Anthony Mtaka aliwakilishwa na Mkuu wa Wilaya ya Chamwino Bi Gift Msuya kama Mgeni rasmi na takribani Miti 3,000 ilipandwa katika eneo hilo.

Wadau tofauti tofauti wanaoshughulikia utunzaji wa Mazingira nchini kama Wakala wa Misitu Tanzania TFS, Lead Foundation (Kisiki hai), na Chuo Kikuu cha Dodoma, UDOM na wengine wengi, walijitokeza kushiriki katika zoezi hilo na walipata nafasi ya kutoa neno ambapo TFS wamesema kuwa wana jukumu la kutunza na kuendeleza rasilimali Misitu nchini na zoezi hilo ni muendelezo wa kampeni ya kuikijanisha Dodoma iliyoanzishwa na Rais Samia Suluhu Hassan mwaka 2018 alipokua Makamu wa Rais.Tangu hapo, TFS iliendelea na zoezi la upandaji Miti ambapo Dodoma Jiji ndio alikua mdau Mkubwa kwa kufanikisha upandaji wa Miti zaidi ya Milioni Tano mpaka Sasa na kwa Mwaka huu pekee tayari wamepanda Miti 780,000.

Baadhi ya wadau wa Mazingira walioshiriki katika zoezi hilo wamehamasisha wananchi kutunza Mazingira kwa njia za asili ili kuendeleza mpango mkakati wa kuifanya Dodoma ya kijani kuepuka hali ya ujangwa iliyokua ikiinyemelea. Pia Wadau wa Lead Foundation maarufu kama "Kisiki hai",  wamefanikiwa kutoa elimu ya utunzaji wa Mazingira na kuanzia mwaka 2018 mpaka Sasa, viongozi 365 wa vijiji vinavyopatikana katika Wilaya za Dodoma na wakulima 175,000 wameelimishwa.

Makamu Mkuu wa Chuo Kikuu cha Dodoma, UDOM, Prof. Donald Mpanduji naye alipata nafasi ya kuongea machache na alisema kuwa Chuo chake ni Wadau wakubwa wa utunzaji wa Mazingira kwani kinatoa taaluma ya Misitu na wameshapanda takribani Miti 20,000 katika maeneo tofauti tofauti huku kwa Mwaka huu pekee wakiwa wameshapanda Miti 3,000."Jukumu kubwa la Chuo Kikuu cha Dodoma ni kutoa elimu na ushauri wa kimaendeleo kwa jamii zinazokizunguka Chuo juu ya utunzaji wa Mazingira" Prof. Mpanduji.

Bi Khadija Yusuph, Balozi wa Mazingira chini ya Ofisi ya Makamu wa Rais, alipata fursa ya kuongelea kampeni ya "SOMA NA MTI" yenye lengo la kuwaelimisha wanafunzi umuhimu wa kupanda Miti na amesema kila mmoja ana haki ya kutunza Mazingira hivyo wanafunzi wanatakiwa kujifunza hilo tangu shuleni kwa kuhakikisha kila mwanafunzi anapoanza shule anapanda mti wake na kuutunza mpaka siku atakapohitimu masomo yake katika shule husika.

Akihitimisha kwa niaba ya Mkuu wa Mkoa, Bi Msuya alitoa maelekezo ya Mhe. Mtaka kwa Wadau wanaoshughulikia utunzaji wa Mazingira kwa kuwataka TFS kuzalisha Miche ya kutosha ya Matunda kwani Matunda yatasaidia kuboresha afya za wanajamii pia amewataka viongozi na wadau wa Mazingira kutoa Elimu ya utunzaji wa Mazingira kwa wananchi na kuhakikisha pia wanakomesha matumizi ya mifumo ya plastiki ambayo ilipigwa marufuku hapo awali lakini inaonekana kuendelea kutumika kwa wingi katika baadhi ya maeneo.Bi. Msuya aliongeza kuwa upandaji Miti katika eneo la Mvumi Makulu umefanyika kwa kuwa eneo hilo lina historia kubwa kwa viongozi wetu enzi za kupigania Uhuru wa nchi hivyo linapaswa kuenziwa. Aidha, amewataka wananchi kuchangamkia fursa ya kupanda Miti katika maeneo yao kwani TFS wanazalisha Miche mingi na wanaigawa bure kwa yeyote atakayehitaji kupanda katika eneo lake.

MWISHO