VIFAA VYA UJENZI VINUNULIWE KWA WAKATI - RC SENYAMULE

Imetumwa : January 8th, 2025

Na Sofia Remmi

Habari-Dodoma Rs.

Mkuu wa mkoa wa Dodoma Mhe.Rosemary Senyamule ameyasema hayo wakati wa ziara ya kikazi ya kukagua Miradi ya ujenzi  katika Halmashauri ya Wilaya ya Chamwino tarehe 08 Januari 2025.

Akizungumza na wajumbe alioambatana nao pamoja  na wasimamizi wa miradi hiyo Mhe. Senyamule amesema ni wajibu wa kila Msimamizi na Mhandisi  kuhakikisha vifaa vyote vya  ujenzi vinakuwepo eneo la ujenzi ili kuepuka kusimama kwa ujenzi na kuongezeka kwa gharama kunakoweza kusababishwa na kupanda  kwa gharama  za vifaa.

“Mhe Rais analeta fedha kwa wakati, vifaa vinunuliwe vyote, ujenzi usisimame. Na kila mradi  uwe na mpango kazi wake, kila fundi lazima azingatie hilo maana  mpango kazi ndio kitu kitakachokuongoza katika kazi yako", Amesema Mhe. Senyamule.

Kwa upande wake Mkuu wa Wilaya ya Chamwino Mhe. Janeth Mayanja amesema "Kila eneo ambalo limepewa fedha za Miradi kutoka kwa Kiongozi wetu, Rais wetu na sisi kama wasimamizi tutazingatia ubora wa kila jengo na miradi yote tutahakikisha inakamilika ndani  ya muda uliopangwa", amesema Mayanja

Katika ziara hiyo Mhe.  Senyamule amekagua ujenzi wa Shule ya Msingi Majeleko inayogharimu kiasi cha shilingi Milioni 318, mradi ambao upo katika hatua ya kupaua kwa na ujenzi wa shule mpya ya amali inayojengwa katika kijiji cha Nzali kata ya Chilonwa, ambapo hadi kukamilika kwake, utagharimu kiasi cha shilingi Bilioni 1.6, ikijumuisha ujenzi wa Jengo la utawala, Maktaba 01, Madarasa 09, Maabara 02, mabweni 04, vyoo vya Wasichana 04, Vyoo vya wavulana 04, kichomea taka 01 na nyumba 1 ya  mwalimu.

#dodomafahariyawatanzania

#keroyakowajibuwangu.