VYAMA VYA USHIRIKA VYAPONGEZWA KWA KUHAMIA KWENYE MATUMIZI YA TEHAMA

Imetumwa : August 6th, 2025

Na. Hellen M. Minja

       Habari – DODOMA RS

Vyama vya Ushirika nchini vimepongezwa kwa kuondokana na matumizi ya analojia na kuingia kwenye matumizi ya Kidijitali (TEHAMA) ambayo yatawezesha wana Ushirika kuwa sehemu ya usimamizi wa Ushirika wao kwa kupata taarifa kwa wakati bila kusubiri Mkutano mkuu.

Pongezi hizo zimetolewa na Mkuu wa Mkoa wa Dodoma Mhe. Rosemary Senyamule Agosti 06, 2025, katika mazungumzo mafupi baada ya kutembelea vikudi vya kuweka na kukopa (SACCOS) vilivyopo chini ya Vyama vya Ushirika katika Kijiji cha Ushirika kilichopo kwenye Maonesho ya Nanenane Kitaifa 2025 yanayofanyika kwenye Viwanja vya Nzuguni Jijini hapa.

“Kikubwa kilichonifurahisha wanaongea kuhusu kutoka kwenye kutumia Teknolojia ya kawaida na kwenda kutumia teknolojia ya Tehama au Kidijitali. Hicho kitu kimenifurahisha sana kwa sababu kitawezesha wanaushirika pia kuwa ni sehemu ya usimamizi wa Ushirika wao kwa sababu watakua wanapata taarifa kwa haraka bila kungoja Mkutano Mkuu.”

Pia amefurahishwa kuanzishwa kwa kitengo cha ukaguzi wa ndani wa Hesabu za Ushirika ambacho kitasaidia utunzaji wa taarifa za kifedha na nyinginezo ambazo ni muhimu kwa ukuaji wa Ushirika, Wananchama na Wadau wengine wa Ushirika.

Mhe. Senyamule amesema Ushirika ni uchumi wa nchi kwani umesaidia kupanda kwa bei ya mazao kutokana na kuacha kutumia watu wa-kati kuuza mazao na kwa sasa kila SACCOS ina bei yake ambayo ni ya Kimataifa hali inayoashiria Mkulima anafaidika moja kwa moja na bei hiyo.

Awali, Mkuu huyo wa Mkoa alitembelea SACCOS mbalimabali kama vile Shirikisho la vyama vya Ushirika Tanzania (TFC), Moshi Co-operative University( MoCu), Shirika la Ukaguzi na Usimamizi wa Vyama vya Ushirika, Tume ya Maendeleo ya Ushirika Tanzania, Bumaco Insurance na Ngome Saccos.

Kaulimbiu: “Chagua Viongozi Bora Kwa Maendeleo Endelevu ya Kilimo, Mifugo na Uvuvi”

#nanenanekitaifa2025kandayakati

#dodomafahariyawatanzania

#wekezadodomastawishadodoma

#keroyakowajibuwangu