WAFANYAKAZI MSISAHAU JUKUMU LA MSINGI LA MALEZI-SAGINI

Imetumwa : May 1st, 2023

Naibu Waziri Wizara ya Mambo ya Ndani ya nchi Mhe.Jumanne Sagini ametoa wito kwa Wafanyakazi wote, mbali na kazi zao za msingi za kila siku wanazozifanya kutosahau kuungana kwa pamoja katika malezi ya watoto na kusimamia maadili mazuri ili kutengeneza kizazi kizuri kwa ujenzi wa taifa.

Mhe.Sagini ametoa Wito huo leo Mei 1,2023 Jijini Dodoma wakati akizungumza Katika Maadhimisho ya siku ya Wafanyakazi Duniani yaliyofanyika kimkoa katika uwanja wa Jamhuri Dodoma.  

"Najua tuna kazi nyingi ila tusisahau jukumu letu la msingi la malezi hili haliepukiki na tukizembea hapa tutatengeneza kizazi ambacho hakitakuja kusaidia jamii wala taifa kwa miaka ijayo," Amesema Mhe.Sagini

Pia Sagini amewataka waajiri kuhakikisha wanawasilisha michango ya waajiriwa wao kwenye mifuko ya hifadhi ya jamii kwani kutokufanya hivyo wanawanyima haki ya msingi waajiriwa wao na kusababisha misuguuano yanapotokea matatizo.

"Na nyie Mifuko ya jamii msikae kimya kwa waajiri ambao hawapeleki michango na msisubiri mpaka mtumishi afariki ndio muanze kufuatilia kwa sababu sio sawa shughulikieni haya mapema ili kuepuka minong'ono," amesisitiza Mhe.Sagini

 Aidha amewataka waajiri kuacha tabia ya kuwachagulia wafanyakazi vyama vya wafanyakazi vya kujiunga navyo kwani kufanya hivyo ni kuwanyima uhuru wao kwani kila mfanyakazi ana uhuru wa kuchagua ni Chama gani ajiunge nacho.

Naye, Mwenyekiti wa TUCTA Dkt Leonia msafiri ambaye alisoma risala kwa niaba ya wafanyakazi Mkoa wa Dodoma ameshukuru Mheshimiwa Dkt. Samia Suluhu Hassan Rais wa Jamhuri ya Muungano wa Tanzania kwa kuendelea kuboresha stahiki za wafanya kazi siku hadi siku.

Aidha, halfa hiyo ilihudhuriwa na viongozi mbalimbali wakiowemo viongozi wa Serikali, Wakuu wa Wilaya ya Dodoma mjini, Kongwa pamoja na Taasisi mbalimbali za umma.