WAFANYAKAZI WA TANESCO WATAKIWA KUWA MABALOZI WA MATUMIZI YA NISHATI YA UMEME KUPIKIA

Imetumwa : August 14th, 2025

Na. Hellen M. Minja

       Habari – DODOMA RS

Wafanyakazi wa Shirika la Umeme nchini, (TANESCO), wametakiwa kuwa Mabalozi wa Ajenda ya matumizi ya nishati safi ya kupikia kutokana na tafiti kuonesha kuwa ‘Majiko janja’ ya umeme yanaweza kutumia chini ya unit 1 ya umeme ambayo ni sawa na shilingi 352 kuandaa mlo mmoja.

Naibu Waziri Mkuu na Waziri mwenye dhamana ya Nishati Mhe. Dkt. Doto Biteko, amebainisha hayo wakati wa hafla ya uzinduzi wa program ya utoaji majiko ya umeme kwa bei ya ruzuku kwa Wafanyakazi wa Shirika hilo iliyofanyika kwenye ukumbi wa Kituo cha Mikutano Jakaya Kikwete Jijini Dodoma Agosti 14, 2025.

Mhe. Dkt. Biteko ameongeza kuwa, ili kusukuma Ajenda ya nishati safi, Wafanyakazi wa TANESCO lazima wawe wa kwanza kutumia nishati hiyo na si kuhubiri tu maana takwimu za 2022 zinaonesha Watanzania wanaotumia nishati hiyo kupikia ni 4.2% ambayo ni ndogo kwa Tanzania inayotumia umeme hivi sasa.

“Kwa historia na mazoea tuliyonayo, watu huamini kuwa kutumia nishati ya umeme kwenye kupika ni ghali sana na hivyo huikwepa nishati hiyo kwa hofu hiyo tu. Tafiti zimeonesha kuwa, Majiko janja ya umeme yanaweza kutumia chini ya unit 1 ya umeme ambayo ni sawa na shilingi 352 kuandaa mlo mmoja”.

Awali, Mkurugenzi Mtendaji wa Shirika hilo Bw. Lazaro Twange, amesema Mpango huo unalenga kutimiza matakwa ya Serikali kufikia 2034, asilimia 80 ya Kaya ziwe zimehama kutoka kwenye matumizi ya nishati chafu kupikia na kuhamia nishati safi ambapo wao kama wazalishaji wa umeme kwa sasa wamefikia 4% ya matumizi ya nishati hiyo kupikia.

Hata hivyo, Mkuu wa Mkoa wa Dodoma Mhe. Rosemary Senyamule amesema katika kipindi cha miaka minne ya Serikali ya Awamu ya Sita, shilingi Bilioni 214.3 zimetolewa kwa Mkoa wake ambazo zimekamilisha usambazaji wa umeme katika Vijiji 580 vya Mkoa huu sambamba na kusambaza nishati hiyo kwenye migodi, visima vya maji na vituo vya afya.

Mpango wa utoaji wa majiko ya umeme kwa wafanyakazi hao, umeanza kwa kutoa majiko 11,000 ambayo yametolewa kwa ruzuku kwani Mfanyakazi atalipia gharama nafuu baada ya kupatiwa jiko hilo na kutakiwa kwenda kulitumia ili kuthibitisha unafuu wa matumizi ya nishati ya umeme kupikia na kuwa mfano kwa jamii ambayo ndio wateja wao.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu