WANAFUNZI 571 WATAJWA KUNUFAIKA NA PROGRAM WEZESHI YA MEMKWA DODOMA

Imetumwa : August 18th, 2025

Na. Hellen M. Minja

       Habari – DODOMA RS

Takribani wanafunzi 571 wamenufaika na program wezeshi ya MEMKWA ndani ya Mkoa wa Dodoma iliyoanzishwa na Serikali kwa dhumuni la kumuwezesha Mtanzania ambaye hakubahatika kupata Elimu kupitia Mfumo rasmi kuipata kwa njia mbadala.

Hayo yamebainishwa na Mkuu wa Mkoa wa Dodoma Mhe. Rosemary Senyamule alipokua akihutubia hadhara wakati wakati wa Maadhimisho ya Juma la Elimu ya watu wazima na Elimu nje ya Mfumo rasmi yaliyofanyika Agosti 18, 2025 katika Uwanja wa michezo wa Puma Wilayani Kondoa.

“Sote hapa ni mashahidi wa jinsi program hizo zilivyowezesha Watanzania kupata elimu pamoja na ujuzi mbalimbali, MEMKWA, wanafunzi 571 hawa bila kuwepo MEMKWA huenda wasingejua kusoma na kuandika. Elimu ya MASAFA  tumeisikia hapa wanafunzi 355, IPOSA tumesikia wanafunzi 240, program ya MKEJA wanafunzi 1,320”.

Mhe. Senyamule meongeza kuwa, Mkoa umekua na mazingira yaliyoboreshwa ya kujifunzia kusoma, kuandika na kuhesabu kwa usawa na ujumuishi wa makundi yote ikiwemo kundi la wenye mahitaji maalum na Serikali inaendelea kuwekeza kwenye miundombinu ya Elimu kwa kutoa fedha kupitia miradi mbalimbali.

Kadhalika, Mkuu wa Wilaya ya Kondoa Mhe. Fatma Nyangasa amesema wastani wa wanafunzi 1,000 wamenufaika na program hizo za elimu na zimeleta tija na matokeo chanya kwa wanufaika ambapo zimetimiza azma ya Mhe. Rais kumhakikishia mtoto wa kike anapata fursa ya kufikia ndoto zake.

Licha ya hayo, Afisa Elimu Mkoa wa Dodoma Mwl. Vicent Kayombo, amesema Mkoa umejikita kusimamia na kuratibu elimu ya watu wazima na elimu nje ya mfumo rasmi kwenye Maeneo ya Uwiano Kati ya Elimu na Jamii (MKEJA) ambapo wana-kisomo wanapata elimu kwa kujifunza maarifa na ujuzi kwenye madarasa maalum yaliyopo kwenye shule za msingi na sekondari.

Maadhimisho ya Elimu ya Watu wazima na Elimu nje ya Mfumo Rasmi yalianzishwa na Shirika la Kimataifa linalojishughulisha na masuala ya Elimu, Sayansi na Utamaduni yakiwa na lengo la kuikumbusha jamii juu ya umuhimu wa Elimu ya Watu wazima ambapo Mkoa wa Dodoma huadhimisha kila mwaka kwenye Wilaya iliyochaguliwa.

Kaulimbiu: “Kukuza Kisomo Katika Zama za Kidijitali kwa Maendeleo Endelevu ya Taifa Letu”

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu