WANAFUNZI KIDATO CHA SITA WAASWA SAFARI YA ELIMU BADO NI NDEFU

Imetumwa : May 17th, 2025

Na. Hellen M. Minja

       Habari – DODOMA RS

Wanafunzi wameaswa kuwa safari ya kutafuta elimu ni ndefu na yenye kuhitaji vipawa na malengo mahsusi ili kuweza kupata mafanikio na maendeleo katika Taifa. Hayo yamesemwa na Mkuu wa Mkoa wa Dodoma Mhe. Rosemary Senyamule wakati wa mahafali ya kuwaaga wanafunzi wa kidato cha sita wa shule ya Sekondari Maria de Mattias.

Katika Mhafali hayo ya 10 yaliyofanyika leo Mei 17, 2025, kwenye ukumbi wa shule hiyo iliyopo Kisasa Jijini Dodoma, Mhe. Senyamule ametoa hotuba yake iliyogusa vipengele kadhaa vyenye kuwausia wanafunzi hao juu ya maisha nje ya shule ambapo aliwekea mkazo suala la elimu.

“Safari iliyopo mbele bado ni ndefu na kubwa, inahitaji vipawa, watu wenye malengo, wachapakazi, wenye bidii kubwa, waaminifu na kwa sababu ni watoto wa kike na kiume, inahitaji watu wanaojitambua na wanaojitunza. Kujitunza ni wajibu wa kila mmoja, lakini inahitaji watu majasiri na wenye ubunifu wa kufanya mambo.”

Hata hivyo, mwakilishi wa Katibu Tawala Mkoa wa Dodoma ambaye ni Afisa Elimu Taaluma Mwl. Justin Machela, amezungumza na wazazi wa wahitimu hao na kuwasisitiza juu ya malezi mema kwa watoto wao ambao bado wanahitaji uangalizi wa karibu wa wazazi kwani sasa wanatoka mikononi mwa Walimu na wanakwenda kuwa chini ya uangalizi wao.

Vilevile, Mkuu wa Shule hiyo Sister Theresia Mkuyi, amewataka Wahitimu kuendelea kuwa na nidhamu, maadili mema na kutumia maarifa waliyopata shuleni hapo kwa manufaa yao binafsi na jamii kwa ujumla, huku wakiwa waangalifu kwenye matumizi ya teknolojia na kuwa Mabalozi wazuri wa shule hiyo.

Shule ya Sekondari Maria de Mattias, ilianzishwa mwaka 2010 chini ya uongozi wa Shirika la Masista wanao abudu Damu ya Kristo ikiwa na wanafunzi 90 wa kidato cha kwanza kwa lengo la kuwalea Wasichana kielimu, kimwili, kiroho na kimaadili. Kwa sasa, shule hiyo ina jumla ya wanafunzi 535 kuanzia kidato cha kwanza hadi cha sita.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu