WANUFAIKA WAFAHAMU ZINAPOTOKA FEDHA ZA TASAF-RC SENYAMULE

Imetumwa : March 10th, 2025

Na. Hellen M. Minja,

       Habari – DODOMA RS

Wasimamizi wa fedha za Mpango wa Kunusuru Kaya Maskini

Nchini (TASAF) Mkoa wa Dodoma, wametakiwa kuhakikisha wanufaika wa Mpango huo wanafahamu kuwa Serikali yao inayoongozwa na Rais, Mhe. Dkt Samia Suluhu Hassan, ndio inayowezesha kupatikana kwa fedha hizo.

Akizungumza wakati wa kikao cha kujadili utekelezaji wa Mpango huo kwa Mkoa wa Dodoma kilichofanyika kwenye ukumbi wa Mikutano uliopo Jengo la Mkapa Jijini humu, Mkuu wa Mkoa wa Dodoma Mhe. Rosemary Senyamule amesema;

“Tunataka walengwa wa TASAF wajue aliyetoa hela ni Serikali ya Jamhuri ya Muungano wa Tanzania kupitia Rais wake Mhe. Dkt. Samia. Serikali yeyote Duniani ikifanya kazi, inatafuta wananchi wake waipende. Wakiipenda Serikali ndipo wanakua na amani na utulivu wa Nchi yao lakini wakiwa hawajui kilichofanyika na Serikali, ni rahisi kutothamini Serikali yenyewe au Viongozi wake”.

Akiwasilisha taarifa ya utekelezaji wa shughuli za TASAF kwa kipindi cha Julai – Desemba 2024 katika Mkoa wa Dodoma, Mratibu wa TASAF Mkoa, Bi Josephine Pascal amesema;

“Mwaka 2024/2025 Mpango uliidhinishiwa shilingi Bilioni 10.4 na hadi kufikia Desemba, Mkoa umepokea shilingi Bilioni 6.6 sawa na 66%.

Aidha Bi. Josephine ameeleza kuwa TASAF ina kipengele cha utoaji wa ajira za muda kwa Walengwa Maskini kinacholenga kuwajengea ujuzi na kukuza kipato ambapo hupewa ujira wa shilingi 3000 kwa siku,na  wanafanya kazi siku 10 kwa mwezi na siku 60 kwa mwaka.”

Mkoa wa Dodoma una Kaya 45,865 sawa na 6% ambazo zinanufaika na Mpango wa kusaidia Kaya maskini Nchini (TASAF). Kupitia mfumo wa e-sehemu, walengwa hao hutambuliwa, kusajiliwa na kupatiwa fedha za kujikimu huku wakijiongezea kipato kwa ajira ndogo ndogo ili waweze kuhudumia familia zao katika nyanja za afya, elimu na chakula.

#dodomafahariyawatanzania

#keroyakowajibuwangu

#mtiwangubirthdayyangu