WAZIRI MKUU WA UGANDA AZURU KIWANDA CHA INTRACOM DODOMA

Imetumwa : January 29th, 2025

Na. Hellen M. Minja,

       Habari – DODOMA RS

Nchi ya Tanzania imetajwa kuwa na ardhi nzuri kwa kilimo na kwa kutumia teknolojia za kisasa, inaweza kuzalisha chakula cha kutosha kulisha Afrika nzima. Hayo yamebainishwa leo Januari 29, 2025 na Waziri Mkuu wa Uganda Mhe. Robinah Nabbanja, alipofanya ziara ya siku moja kutembelea kiwanda cha uzalishaji mbolea cha Itracom kilichopo Nala Jijini Dodoma.

Akizungumza wakati wa hafla ya chakula cha mchana iliyofanyika kwenye Hoteli ya Morena Jijini Dodoma mara baada ya kutembelea kiwanda hicho na kujionea namna uzalishaji wa mbolea kwa ajili ya kilimo unavyofanyika.

“Uganda na Tanzania zina bahati ambayo nadhani imetolewa kimkakati na Mwenyezi Mungu na ni lazima tuilishe Dunia. Nimetembelea nchi za kiarabu, watu wake hawana ardhi lakini wanapaswa kuishi. Wana teknolojia ambayo sisi hatuna hivyo, kama tukizalisha vya kutosha, tutalisha nchi za kiarabu,” Mhe. Nabbanja

Waziri Mkuu huyo ameongeza kuwa, Uganda na Tanzania zinatakiwa kufikiria namna zinavyoweza kuboresha uchumi ambao unawezekana kupitia kilimo kwani soko la Uganda limejaa bidhaa za kilimo na ufugaji kutoka Tanzania kwa kuwa sasa zinapitishwa bila kodi hivyo ni wakati muafaka wa kuangalia fursa za masoko ya nje.

Nae, Waziri wa Viwanda na Bishara Mhe. Selemani Jafo amesema ugeni huo unaweka alama ya ushirikiano wa kiuchumi baina ya nchi hizi mbili ambapo urafiki huo unachangia kukuza maendeleo ndani ya umoja wa nchi za Afrika Mashariki na nyingine. Ameongeza kuwa, uzalishaji wa mbolea bora unahakikisha usalama wa chakula, unakukuza kilimo na uchumi kwa ujumla.

Kadhalika, Mkuu wa Mkoa wa Dodoma Mhe. Rosemary Senyamule, amempongeza kiongozi huyo kwa kutembelea Dodoma na kusema;

“Uganda inaweza kunufaika na mbolea inayotengenezwa katika kiwanda cha Itracom kwani kinafanya usambazaji kwenye nchi zote za Afrika Mashariki na pia kuna fursa ya kujifunza matumizi ya mbolea kupitia mashamba darasa yanayopatikana hapa ambayo yanafanya vizuri”. Mhe. Senyamule

#dodomafahariyawatanzania

#keroyakowajibuwangu

#mtiwangubirthdayyangu