TAASISI ZA UMMA ZATAKIWA KUJIUNGA NA MFUMO KURAHISISHA HUDUMA KWA WANANCHI

Imetumwa : June 17th, 2025

Na. Hellen M. Minja

       Habari – DODOMA RS

Rai imetolewa kwa Taasisi za Umma ambazo bado hazijaanza kutumia Mifumo ya huduma, kujiunga na  Mifumo hiyo kwani hayo ni maelekezo ya Serikali, kutokana na Mifumo hiyo kurahisisha utoaji huduma kwa Wananchi katika sehemu iliyofungamanishwa.

Waziri mwenye dhamana ya Utumishi wa Umma na Utawala Bora Mhe. George Simbachawene (MB), ametoa rai hiyo wakati wa hafla ya kufungua Maadhimisho ya Wiki ya Utumishi wa Umma yanayofanyika kwenye viwanja vya bustani ya Mapumziko Chinangali Jijini Dodoma leo Juni 17, 2025.

“Takribani Taasisi 185 ndio zimejiunga na Matumizi ya Mfumo, lakini zile ambazo bado, ziharakishe na kuhakikisha kwamba zinajiunga ili wananchi wapate huduma katika sehemu moja iliyofungamanishwa. Mifumo hii inatusaidia kurahisisha shughuli mbalimbali ikiwa ni pamoja na e-WATUMISHI ambao unawapa watumishi haki zao kwa wakati”.

Aidha, Katibu Mkuu kutoka Ofisi ya Rais Menejimenti ya Utumishi na Utawala Bora Bw. Juma S. Mkomi, amesema umuhimu wa maonesho hayo ni wananchi wapate huduma za moja kwa moja kutoka kwenye Taasisi husika ikiwemo zile zinazoshughulika na masuala ya Afya sanjari na kufahamu majukumu ya kina ya Taasisi hizo.

Akitoa salamu za Mkao kwa niaba ya Mkuu wa Mkoa wa Dodoma Mhe. Rosemary Senyamule, Mkuu wa Wilaya ya Chamwino Mhe. Janeth Mayanja amesema Sekretarieti ya Mkoa wa Dodoma ina jumla ya Watumishi 20,452 na kumekua na ongezeko la Watumishi ambalo linasaidia kuongeza kasi ya usimamizi wa Sera zinazotekelezwa na Serikali.

Siku ya Utumishi wa Umma Duniani ni Siku maalum ya Watumishi wa Umma ambayo husherehekewa kila ifikapo Juni 23 na Wanachama wa Umoja wa Afrika (AU) kwa lengo la kutambua mchango wa Watumishi hao katika nchi zao ambapo maadhimisho hayo huambatana na maonesho mbalimbali ambayo huanza Juni 16.

Kaulimbiu:  “Himiza Matumizi ya Mifumo ya Kidijiti ili Kuongeza Upatikanaji wa Taarifa na Kuchangia Uwajibikaji”.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu