AMANI YA NCHI YATAJWA KUWA AJENDA YA VIONGOZI WA SERIKALI NA WADINI

Imetumwa : July 13th, 2025

Na. Hellen M. Minja

       Habari – DODOMA RS

Suala la Amani katika nchi yetu ni ajenda ya kudumu kwa Viongozi wa nchi ya Tanzania kwani limekua likikumbushwa kila wakati ikiwa ni maelekezo ya viongozi wakuu wote wakiwemo wale wa Madhehebu ya Dini.

Mkuu wa Mkoa wa Dodoma Mhe. Rosemary Senyamule amebainisha hayo kwenye hotuba aliyoitoa kwa hadhara iliyohudhuria Kongamano la Amani Mkoa wa Dodoma lililoandaliwa na Idara ya Elimu Mahakama ya Kadhi chini ya Baraza Kuu la Waislam Tanzania (BAKWATA) kwa kushirikiana na Ofisi yake na kufanyika katika Ukumbi wa Sephil Sepphire Jijini Dodoma Julai 13, 2025.

“Suala la Amani ya nchi yetu limekua likikumbushwa mara kwa mara ikiwa ni maelekezo ya viongozi wetu wa Kitaifa kama ajenda ya kudumu ya viongozi wa nchi yetu lakini tumesikia pia viongozi wa Dini wakiongea juu ya Amani, kama tunayo dhamira ya kulinda Amani, kila mmoja kwa nia moja, basi Amani yetu itaendelea kuimarika”.

Aidha, Naibu Kadhi Mkuu na Mjumbe Baraza la Maulamaa Taifa Sheikh Ally Khamis Ngeruko amesema kuwa kuna haja ya kutazama Taifa lilipotoka na kutafakari yale waliyoyapitia wapigania Amani hasa kwa wanafunzi waliopo shuleni licha ya kusoma somo la Historia ya Tanzania ili waone umuhimu wa kuitunza Amani hii iliyopo.

Akiwasilisha Mada ya Umuhimu wa Amani wakati na baada ya Uchaguzi, Mkurugenzi wa Idara ya Uhuru wa Kidini na Mambo ya Kijamii Mchungaji Sabato Maseke amesema kuwa baada ya uchaguzi si muda wa kujali nani ameshinda au amepoteza bali ni muda wa kulingalia Taifa zaidi kuepusha Amani yetu kuingia katika migogoro.

Kadhalika, akimuwakilisha Kamanda wa Polisi Mkoa wa Dodoma Galus Hyra, Kamishna Msaidizi wa Polisi Eva Stesheni, amezungumzia nafasi na mchango wa vyombo vya Ulinzi na Usalama katika kuimarisha Amani nchini ambapo amesema vyombo hivyo vinahitaji ushirikiano kutoka kwa Wananchi kwani yote wanayotekeleza ni kwa mujibu wa Sheria.

Kongamano hilo limehitimishwa kwa kufikia maazimio kadhaa baada ya majadiliano ikiwa ni pamoja na; Sheria za mitandao zinatakiwa zieleweke kwa uzuri na ubaya wake, demokrasia iwe inapatikana wakati wote sio kipindi cha uchaguzi tu, kuheshimu na kutii Mamlaka halali kunaimarisha Amani na kujibidiisha katika shughuli kunaimarisha Amani.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu