AZZIM DEWJI KUINUA UCHUMI WA DODOMA KWA MITI YA MATUNDA

Imetumwa : February 3rd, 2025

Na. Hellen M. Minja,

       Habari – DODOMA RS

Katika muendelezo wa juhudi za kuikijanisha na kuipendezesha Dodoma kupitia Kampeni mbalimbali za upandaji miti, Mfanyabiashara maarufu nchini Bw. Azzim Dewji, amefika ofisini kwa Mkuu wa Mkoa wa Dodoma kuunga mkono juhudi hizo akilenga eneo la kuinua uchumi wa Wanadodoma kwa kupanda miti ya matunda.

Mfanyabiashara huyo amefika ofisini hapo leo Februari 03, 2025 akiwa na ujumbe ulioongozana nae ambapo Mkuu wa Mkoa wa Dodoma Mhe. Rosemary Senyamule alifanya kikao kifupi kwenye ukumbi wa Ofisi yake kwa kushirikisha wajumbe wachache ambao ni wadau wa ajenda ya upandaji miti katika Jiji hili.

“Mgeni wetu amenieleza dhamira yake kubwa ya kutaka kuungana na juhudi za Mhe. Rais hapa Dodoma za kuifanya Dodoma iwe ya kijani lakini ukijani wenyewe uambatane na uchumi wa wananchi wa Dodoma. Alisema anatamani kupanda miti ya matunda kwenye barabara ya kutoka Chamwino hadi Dodoma Mjini” Mhe. Senyamule

Mhe. Senyamule ameongeza kuwa hili ni jambo la Baraka kwa sababu limekutana na ajenda mbili za Mkoa ambazo ni ‘Dodoma ya kijani’ na ‘uchumi wa wananchi wa Dodoma’ kwani ukimpa mwananchi miche miwili ya miti ya matunda baadae akaanza kuuza, atakuza uchumi wake.

Aidha, Mkuu wa Wilaya ya Dodoma Mjini Mhe. Jabir Shekimweri, ameshauri zoezi la upandaji miti hiyo lifanyike kwa awamu mbili kwa matokeo chanya kwani upandaji miti ni zoezi moja lakini utunzaji wake unaweza kuwa changamoto hivyo awamu ya kwanza ipandwe miti mikubwa na awamu ya pili ipandwe ile iliyokua midogo kutoka kwenye vitalu.

Akizungumza wakati wa kikao hicho, Bw. Dewji amesema; Ardhi ya Dodoma inaweza kustawisha miti ya matunda kwa kiasi kikubwa na kuvuna huku, kupitia usafiri wa treni ya kisasa (SGR), uwezekano wa kuuzwa mikoa mingine ni mkubwa hivyo uchumi wa Mkoa na wananchi wake utakua kwa kasi kupitia biashara ya matunda.

Zoezi la upandaji miti ya matunda kwa hisani ya mfanyabiashara huyo, linatarajiwa kuanza mara moja kwenye kipindi hiki cha msimu wa mvua ambapo kwa Jiji la Dodoma, inatarajiwa kupandwa pembezoni mwa barabara kubwa, eneo la jeshi, pembezoni mwa mradi wa barabara za mzunguko wa nje, eneo la Mji wa Serikali, Mtumba, na kwenye barabara za Wilaya ya Chamwino.

#dodomafahariyawatanzania

#keroyakowajibuwangu

#mtiwangubirthdayyangu