CHANJO DHIDI YA POLIO KUAZNA SEPTEMBA 21-24

Imetumwa : September 16th, 2023

Wizara ya afya imefanya mafunzo maalumu kwa wanahabari wa Mkoa wa Dodoma kuhusu kuanza kwa kampeni ya utoaji chanjo ya ugonjwa wa polio inayotarajiwa kuanza kutolewa katika mikoa 6 nchini Tanzania ambayo ipo kwenye hatari zaidi ya kupata ugojwa huo kutokana na kugundulika kwa Mtoto mmoja katika Wilaya ya Sumbawanga, Mkoa wa Rukwa.

Mafunzo hayo ya siku moja yaliyofanyika kwenye ukumbi wa ofisi ya Mkuu wa Mkoa wa Dodoma, yamelenga kuwaelimisha wanahabari taarifa sahihi za ugonjwa wa polio pamoja na namna utoaji chanjo unavyofanyika huku Mgeni Rasmi katika mafunzo hayo akiwa ni Mkuu wa Mkoa wa Dodoma Mhe. Rosemary Senyamule ambaye ametoa tathmini ya chanjo kimkoa na pia kuwaasa wananchi kupeleka watoto kupatiwa chanjo ya Polio

"Hali ya utoaji wa chanjo mbalimbali kwa watoto chini ya miaka mitano katika Mkoa wa Dodoma ni nzuri sana, kwa takwimu za Aprili - Juni 2023 katika chanjo ya Penta ya 3, Mkoa umeweza kufikia lengo na kuzidi kwa asilimia 99 na katika chanjo ya Surua rubella, Mkoa umefikia lengo na kuzidi kwa asilimia 97. Hata hivyo, napenda kuendelea kuwakumbusha wananchi wenzangu katika Mkoa wa Dodoma kuendelea kupeleka watoto kwenye vituo vya kutolea huduma za afya ili waweze kupatiwa chanjo" Amesema Mhe. Senyamule.

Mkufunzi kwenye mafunzo hayo Dkt. Florian B. Tinuga ambaye ni Meneja Mpango wa chanjo, ameelezea kwa undani namna virusi vya Polio vinavyoweza kuambukizwa kutoka kwa mtu mmoja kwenda kwa mwingine na baadhi ya viashiria vya ugonjwa huo.

"Ugonjwa wa Polio unaambukizwa kwa njia ya mdomo kwa maana ya chakula au kinywaji kilichobeba virusi hivyo. Ugonjwa unapoingia mwilini unakwenda kudhoofisha Neva za fahamu hivyo inategemea ni Neva ya kiungo gani cha mwili kwani baadae kiungo hicho hupooza kabisa. Baadhi ya viashiria vya ugonjwa wa Polio ni kulemaa kwa ghafla, kukosa nguvu, kulegea viungo, kukosa nguvu na kushindwa kunyanyua mguu au mkono na Mtoto kushindwa kukaa. Nawasihi wananchi kuchukua tahadhari kujikinga na Polio" Amesema Dkt. Tinuga.

Takwimu zinaonyesha kuwa mgonjwa wa mwisho wa Polio kugundulika nchini ilikua Julai mwaka 1996 na kuanzia mwaka 1975 mpaka Sasa chanjo zilianza kutolewa kwa vipindi tofauti. Kwa sasa chanjo ya Polio inatarajiwa kutolewa katika mikoa 6 inayokaribiana na Rukwa ambayo ni Rukwa yenyewe, Mbeya, Katavi, Songwe, Kigoma na Kagera huku ikilenga Halmashauri 37 kutoka mikoa hiyo kwa idadi ya watoto 3,250,598 wenye umri kuanzia miaka 0 hadi 8. Chanjo ya Polio inatarajiwa kutolewa kuanzia Septemba 21 - 24 na watoa huduma watatembea nyumba kwa nyumba.

MWISHO