GoTHOMIS YAONGEZA UKUSANYAJI MAPATO WILAYA YA KONGWA

Imetumwa : March 10th, 2025

Na. Mbonea Masha,

       Habari – KONGWA

Hospitali ya Wilaya ya Kongwa imefanikiwa kufunga mfumo wa GoT- HoMIS kwa 99% katika vitengo mbalimbali, hatua iliyopelekea ongezeko la ukusanyaji wa mapato kwa mwezi kutoka shillingi 7,000,000 hadi shilingi 15,000,000 ambayo ni zaidi ya mara mbili ya mapato yaliyokuwa yanapatikana kipindi cha nyuma kabla mfumo huo haujafungwa.

                                                                                                                                                                                                                                                                                          Hayo, yameelezwa na Mganga Mfawidhi wa Hospitali ya Wilaya ya Kongwa Dkt. Philimon Majaliwa, alipokua akisoma risala fupi mbele ya Katibu Tawala Mkoa wa Dodoma Bw. Kaspar K. Mmuya katika ziara ya kikazi Kutembelea miradi ya maendeleo katika Wilaya ya Kongwa.

                                                                                                                                                                                                                                                                                  Dkt. Majaliwa ameeleza kuwa hospitali yake imefanikiwa kuwa na upatikanaji wa bidhaa za afya ikiwemo dawa kwa 92% na kuweka bayana kuwa malengo ni kufikia 100% ili kuweza kukidhi mahitaji ya wagonjwa watakaofika hapo kupatiwa matibabu.

Aidha Dkt. Majaliwa ameeleza kuwa hospitali imenufaika kwa kiasi kikubwa baada ya kuongezewa gari la kubeba wagonjwa ambalo limesaidia upatikanaji wa huduma za dharura kwa wagonjwa wanaotoka maeneo mbalimbali ya Wilaya hiyo.

                                                                                                                                                                                                                                                                                                                                                                                                                                                                                                                                                                             Akizungumza na Watumishi hao wa afya, Bw. Mmuya amesema, mpango wa Serikali kuleta mifumo ni kuhakikisha taarifa zote za huduma wanazopatiwa wananchi zinahifadhiwa ipasavyo kuanzia kipindi ambacho mteja anapokelewa, mpaka njia ya malipo atakayotumia kwa maslahi mapana ya Taifa ikiwemo kuongeza uwajibikaji wa watumishi wa umma, kuleta uadilifu kazini pamoja na kuziba mianya ya rushwa.

Akihitimisha ziara yake katika hospitalini hapo, Katibu Tawala huyo, ametoa maelekezo kwa watumishi wa Mkoa wake kupewa stahiki zao sababu ni haki yao na pia Serikali ina uwezo wa kulipa na amesisitiza dhana ya kuishi kwa upendo mahala pa kazi na kuwataka watumishi wenye vyeo vikubwa kazini kuwapenda watumishi walio na vyeo vidogo ili kuleta mazingira rafiki katika kazi.

                                                                                                                                                                                                                                                                               Hospitali ya wilaya ya Kongwa inapokea rufaa kutoka katika vituo tisa vya Halmashauri na zahanati zake, na inatoa huduma ya kulaza wagonjwa, kupokea wagonjwa wa dharura, upasuaji mdogo na mkubwa, huduma ya mama na mtoto, macho, meno, na huduma nyinginezo.

#dodomafahariyawatanzania

#keroyakowajibuwangu

#mtiwangubirthdayyangu