HEKIMA ZA WAZEE KUSAIDIA KUDUMISHA AMANI YA NCHI KUELEKEA UCHAGUZI MKUU 2025

Imetumwa : July 8th, 2025

Na. Hellen M. Minja

       Habari – DODOMA RS

Hekima za Wazee zinatajwa kusaidia kudumisha amani ya Nchi, hasa kwenye kipindi hiki ambacho Taifa linatarajia kuingia kwenye uchaguzi Mkuu mnamo  Oktoba 2025. Hayo yamesemwa na Nabii Mkuu GeoDavie wa Kanisa la Ngurumo ya Upako lililopo Jijini Arusha alipokua kwenye kikao cha Maridhiano kilichofanyika katika Ukumbi wa Hoteli ya Morena Jijini Dodoma Julai 08, 2025.

Kikao hicho kimehusisha wana Jumuiya ya Maridhiano ya Amani Tanzania ambayo ni Viongozi wa Madhehebu ya Dini za Kiislamu na Kikristo Nchini kikiwa na lengo la kujadili masuala mbalimbali yanayohusu kudumisha Amani.

“Hekima za wazee hazitakiwi kupotea bure, tunamuomba Mhe. Rais aturuhusu kipindi cha kampeni wagombea wakishapita, na sisi tupite kama jopo la Amani na Maridhiano ili Nchi iendelee kuwa na amani, upendo na mshikamano” amesema Nabii Geodavie.

Kwa upande wake  Mwenyekiti wa Masheikh na Maaskofu Dr. Sheikh Alhaji Mussa Salim amekumbusha juu ya madhumuni ya Jumuiya hiyo kuwa ni kusimamia amani na utulivu kwa Watanzania bila kujali imani, dini, mila, rangi wala itikadi za kisiasa. Lakini pia kuleta muafaka katika mambo yanayosababisha tofauti katika dini, siasa na madhehebu mbalimbali Nchini.

Vilevile, Mkuu wa Mkoa wa Dodoma Mhe. Rosemary Senyamule, amesema kuwa Amani, mshikamano na umoja wa Kitaifa ni Tunu adhimu kwa Taifa letu ambayo kila Mtanzania ana jukumu la kuchukua hatua madhubuti kuilinda.

“Unapoona kuna uhitaji wa nchi yetu kulinda amani, mshikamano na kulinda umoja wa Kitaifa, ni jukumu la kila Mtanzania kuchukua hatua madhubuti zitakazopelekea amani, umoja na mshikamano wa Kitaifa. Tunu hii tunatakiwa tuilinde kwa uchungu mkubwa”.  

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu