MAADHIMISHO YA SIKU YA WATU WENYE ULEMAVU DUNIANI MKOA WA DODOMA DISEMBA 3, 2019

Imetumwa : December 3rd, 2019

DC Kondoa Mhe. Sezaria Makota awapongeza Watu wenye Ulemavu na kusisitiza jamii ihakikishe inawapa kipaumbele ili washiriki kuleta Maendeleo endelevu.

(Na Ofisi ya Mkuu wa Mkoa Dodoma)

Mkuu wa Wilaya ya Kondoa Mhe. Sezaria Makota amewapongeza watu wenye ulemavu kwa namna walivyo mstari wa mbele kushiriki katika shughuli zinazochangia kuleta Maendeleo endelevu hapa nchini na hivyo kuondoa ile dhana potofu kwamba Watu wenye ulemavu ni tegemezi.

Katika kutoa fursa pana zaidi kwa Watu wenye ulemavu kushiriki katika shughuli za maendeleo, Mhe. Makota amewataka Wakurugenzi wa Mamlaka za Serikali za Mitaa kwenye Mkoa wa Dodoma kuhakikisha wanatenga asilimia mbili (2%) ya mapato ya ndani ya Halmashauri zao kwa ajili ya kuwakopesha watu wenye ulemavu ili waweze kuanzisha na kuendesha shughuli za kiuchumi na biashara ambazo zitawaingizia kipato na kuwapa uwezo wa kuchangia zaidi maendeleo ya nchi.

Ameyasema hayo wakati wa Maadhimisho ya siku ya watu wenye ulemavu Duniani ambayo kimkoa (Dodoma) yamefanyika kwenye Wilaya ya Kondoa. Akimuwakilisha Mkuu wa Mkoa wa Dodoma katika Maadhimisho hayo, Mkuu wa Wilaya ya Kondoa Mhe. Sezaria Makota amesema suala la Wakurugenzi wa Mamlaka za Serikali za Mitaa kutenga asilimia mbili (2%) ya mapato ya ndani ya Halmashauri zao kwa sasa ni suala la kisheria na siyo la hiari katika kuwatengea watu wenye ulemavu.

“Serikali ya Awamu ya tano ya Mheshimiwa Dkt.John Pombe Magufuli imeendelea kulisimamia hili kwa kufanya marekebisho ya Sheria ya Fedha 2018 kwa kulifanya suala hili kuwa la Kisheria” alibainisha Mheshimiwa Makota.

Ametoa wito kwa watu wenye ulemavu kuendelea kuchangamkia fursa hiyo kwa kujitokeza kwa wingi kwenye vikundi na kuwekeza shughuli za uzalishaji mali na uwekezaji mbalimbali kupitia mikopo hiyo inayotolewa na Halmashauri za Serikali za Mitaa ili kujiinua kiuchumi katika familia zao,Kaya na Taifa kwa ujumla. 

Shirikisho la Vyama vya watu wenye Ulemavu - SHIVYAWATA Mkoa wa Dodoma limeipongeza na kuishukuru Serikali ya Awamu ya Tano kwa kutokuliacha nyuma kundi muhimu la watu wenye ulemavu katika mipango ya maendeleo.

Akitoa salamu za SHIVYAWATA Mkoa wa Dodoma Katibu wa shirikisho hilo Ndg. Justus Ng’wantalima amesema kuwa katika Uongozi wa Serikali ya Awamu ya Tano kumekuwa na Ongezeko kubwa la watoto wenye ulemavu wanaoandikishwa kujiunga na elimu ya awali, msingi na sekondari kupitia mpango wa elimu bila malipo na kusoma bure hadi kumaliza kidato cha nne huku wakipatiwa vifaa saidizi katika kusoma na kujisomea.

Ameongeza kuwa watu wenye ulemavu wamekuwa wakijumuishwa kwenye kamati mbalimbali za maamuzi kama vile Kamati ya Ushauri ya Mkoa (RCC) na Kamati za Wilaya (DCC); Kamati za UKIMWI za Halmashauri, Kamati za ulinzi wa mama na mtoto na nyingine nyingi. Amepongeza hatua za kuundwa kwa kamati za watu wenye ulemavu kuanzia ngazi ya Mkoa hadi ngazi ya vijiji na mitaa na kuishukuru Serikali ya Awamu ya Tano kuteua watu wenye ulemavu kushika nyadhifa mbalimbali za uongozi na utumishi Serikalini.

Ameiomba Serikali kushughulikia tatizo la Ukosefu wa Takwimu halisi za watu wenye ulemavu ili mahitaji yao yaweze kujumuishwa na kushughulikiwa kwa ufasaha na ukamilifu kwenye mipango mbalimbali ya maendeleo.