MZUMBE MBIONI KUANZA KAMPASI DODOMA

Imetumwa : July 14th, 2025

Makamu Mkuu wa Chuo Kikuu Mzumbe Prof. William Mwegoha amesema Mzumbe iko mbioni kuanzisha Kampasi Mkoani Dodoma.

Prof. Mwegoha ameyasema hayo tarehe 14 Julai 2025 mara baada ya kukutana na kufanya mazungumzo na Mkuu wa Mkoa wa Dodoma Mhe. Rosemary Senyamule.

Amesema Chuo kimedhamiria kusogeza huduma kwa jamii hususan Makao Makuu ya Nchi ikiwa ni sehemu ya utekelezaji wa Mpango Mkakati wa Chuo hicho.

Akizungumza na sehemu ya Menejimenti ya Chuo Kikuu Mzumbe , Mkuu wa Mkoa wa Dodoma Mhe. Rosemary Senyamule amesema Mkoa wa Dodoma ni mkoa wa kimkakati na ni makao Makuu ya Serikali hivyo kuna wadau wengi sana na ametoa rai kwa Menejimenti kuanzisha kampasi mapema ili kuendana na mahitaji halisi ya mkoa kwa sasa.

"Dodoma inakuwa kwa kasi kubwa na Mzumbe mnafahamika na mmejitanabaisha katika Menejimenti hivyo oneni uwezekano wa kuanzisha kozi za kimkatati kwa kuzingatia mpango wa muda mfupi na muda mrefu" Amesisitiza Mhe. Senyamule

Katika ziara hiyo ya siku moja Makamu Mkuu wa Chuo Kikuu Mzumbe Prof. William Mwegoha pamoja na ujumbe wake pia amepata fursa ya kukutana na Mkurugenzi wa Jiji la Dodoma Dkt. Frederick Sagamiko na kumhahikishia mipango ya Serikali katika uanzishwaji wa Chuo Kikuu Mzumbe Kampasi ya Dodoma.