MFUMO WA BARUA YA UTAMBULISHO WA MAKAZI KIDIGITALI (NaPA) WAZINDULIWA DODOMA

Imetumwa : February 8th, 2025

Na. Hellen M. Minja,

Habari - DODOMA RS

Waziri Mkuu wa Jamhuri ya Muungano wa Tanzania Mhe. Kassim Majaliwa, amewataka Watanzania kutumia Mfumo wa Barua ya Utambulisho wa Makazi Kidijitali (NaPA), ulioanzishwa na Wizara ya Mawasiliano na Teknolojia ya Habari kwa lengo la kurahisisha upatikanaji wa huduma na taarifa za makazi.

Mhe. Majaliwa amebainisha hayo kwa kutaja faida za matumizi ya Mfumo huo wakati wa hafla ya kilele cha maadhimisho ya Wiki ya Anwani za Makazi iliyoanza Februari 06, 2025 na kuhitimishwa leo Februari 08, 2025 kwenye ukumbi wa Mikutano wa Jakaya Kikwete, Jijini Dodoma.

"Mfumo huu unarahisisha upatikanaji wa huduma za kijamii, ulinzi na usalama eneo la Makazi, kuchochea uchumi na ukuaji wake, kuwezesha biashara kufanyika wakati wote na uwezo wa kukabiliana na majanga kwenye maeneo yetu. Hivyo basi, nchi yeyote, haiwezi kunufaika bila kuwa na Mfumo wa Anwani za Makazi". Mhe. Majaliwa.

Aidha, Waziri mwenye dhamana ya Mawasiliano na Teknolojia ya Habari Mhe. Jerry Silaa, amesema, maadhimisho ya Wiki ya Anwani za Makazi yanalenga kutoa hamasa kwa Taasisi na Wakazi kutumia Anwani kupata manufaa yaliyokusudiwa hivyo, Wizara inaendelea kusimamia Mifumo ya Utambuzi wa Watu, Biashara na Makazi.

Katika taarifa yake ya Mkoa wa Dodoma, Mkuu wa Mkoa huu Mhe. Rosemary Senyamule amesema,

"Mkoa wa Dodoma una minara ya mawasiliano 36 kati ya 758 iliyosimikwa Nchini na kwa upande wa Anwani za Makazi, awali, tulikua na Anwani 673,340, tukapata ongezeko la Anwani 59,147 na kufanya mpaka sasa Mkoa kuwa na jumla ya anwani za makazi 732,487 ambapo vyote hivi, vimewezesha urahisishaji wa mawasiliano ndani ya Mkoa"

Maadhimisho hayo ambayo yamefanyika kwa mara ya kwanza mwaka huu sambamba na uzinduzi rasmi wa Mfumo wa Barua ya Utambulisho wa Makazi Kidijitali (NaPA), yanatarajiwa kuwa endelevu kila mwaka kwani yatawezesha wananchi kupata huduma mbalimbali ndani ya wiki hiyo ikiwemo kufahamu zaidi juu ya Anwani za Makazi.

Kauli mbiu: "Tambua na Tumia Anwani za Makazi kurahisisha Utoaji na Upokeaji wa Huduma"

#dodomafahariyawatanzania

#keroyakowajibuwangu

#mtiwangubirthdayyangu