MIRADI MIKUBWA YA KIMKAKATI KUPITIWA NA MWENGE WA UHURU DODOMA

Imetumwa : April 20th, 2025

Na. Hellen M. Minja,

       Habari - DODOMA RS

Mwenge wa Uhuru 2025 Mkoa wa Dodoma, unatarajiwa kupitia Miradi mikubwa ya kimkakati inayotekelezwa Mkoani hapa ambapo pia ni Makao Makuu ya Nchi. Miradi hiyo ni pamoja na Ujenzi wa uwanja wa ndege wa Kimataifa Msalato, Ujenzi wa Barabara ya mzunguko wa nje, Mradi uliokamilika wa Treni ya mwendo Kasi SGR, Mji wa Serikali Mtumba na mingine mingi.

Hayo yamesemwa leo Aprili 20, 2025 na Mkuu wa Mkoa wa Dodoma Mhe. Rosemary Senyamule wakati wa hotuba yake ya kupokea Mwenge wa Uhuru 2025 katika uwanja wa CCM uliopo Kata ya Kibaigwa, Wilaya ya Kongwa ambao utakimbizwa kwa umbali wa KM 1,333 kwenye Wilaya 7 na Halmashauri 8 za Mkoa kupitia miradi yenye thamani ya jumla ya shilingi 61, 105, 007,015.00.

Akipokea Mwenge huo kutoka kwa Mkuu wa Mkoa wa Morogoro Mhe. Adam Malima, Mkuu wa Mkoa wa Dodoma Mhe. Rosemary Senyamule ameitaja miradi hiyo.

"Mkoa wa Dodoma una miradi mikubwa ambayo wanadodoma wanatakiwa kuifahamu, tuna Ujenzi wa Mji wa Serikali, Mtumba, ambao umefikia 70%, Ujenzi wa Treni ya mwendo Kasi SGR ambao ulifunguliwa Oktoba 2024, Ujenzi wa uwanja wa ndege wa Kimataifa Msalato, ambao umefikia 53% jengo la abiria, lakini 86% Barabara za kurukia ndege.

"Ujenzi wa Barabara ya mzunguko wa nje katika Jiji la Dodoma ambao upo hatua za mwisho za Ujenzi, Ujenzi wa skimu za umwagiliaji chini ya Programu ya 'Jenga kesho iliyo Bora', sisi tunayo miradi sita inayoendelea katika Wilaya mbalimbali za Mkoa, Ujenzi wa kituo cha michezo, Ujenzi wa uwanja wa Mpira wa miguu unaendelea kwa Bilioni 310, ukamilishaji wa Makao makuu ya mihimili ya Serikali, kituo cha kuondoa sumu kuvu kwenye mazao ambacho kimeongeza thamani ya mazao yanayouzwa nje ya Nchi.

Aidha, ameongeza, kuwa kupitia kauli mbiu ya mbio za Mwenge wa Uhuru 2025 yenye ujumbe Mkuu wa "Jitokeze Kushiriki Uchaguzi Mkuu wa Mwaka 2025 kwa Amani na Utulivu", Mkoa umeshafanya kazi nyingi na unaendelea kuhakikisha kauli mbiu hiyo inatekelezwa ambapo baadhi ya mambo yaliyofanywa ni pamoja na;

Kuandikisha wananchi katika daftari la kudumu la mpiga kura, kuwahamasisha wananchi kutunza kadi ya mpiga kura, kujitokeza kugombea nafasi mbalimbali za uongozi kwa wenye sifa, kushiriki kwenye Mikutano ya kampeni, kujitokeza kupiga kura na kujiepusha na vitendo vyenye kuashiria uvunjifu wa amani.

Mwenge wa Uhuru 2025 ambao umeanza rasmi mbio zake Mkoani Dodoma leo  Aprili 20, 2025 kwa kupitia  miradi 8 kwenye Halmashauri ya Wilaya ya Kongwa, unatarajiwa kutamatisha mbio hizo mnamo Aprili 27 na kukabidhiwa katika Mkoa wa Iringa Aprili 28, 2025. Wananchi wanaaswa kujitokeza kwa wingi kushuhudia mbio hizo pindi zinapopita kwenye maeneo yao.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu

#karibumwengewauhuru2025mkoawadodoma