MKURUGENZI MKUU MPYA TAKUKURU AJITAMBULISHA MAKAO MAKUU YA NCHI DODOMA

Imetumwa : January 8th, 2025

Na. Hellen M. Minja,

       Habari – DODOMA RS

Mkuu wa Mkoa wa Dodoma Mhe. Rosemary Senyamule, leo Januari 08, 2025, ametembelewa na Mkurugenzi Mkuu wa Taasisi ya kuzuia na kupambana na rushwa (TAKUKURU) Bw. Fransic Chalamila aliyeteuliwa hivi karibuni, lengo likiwa ni kujitambulisha kwenye ofisi ya Mkoa na Makao Makuu ya Nchi.

Mhe. Senyamule ametumia nafasi hiyo kumpongeza Mkurugenzi huyo kwa kuteuliwa katika nafasi hiyo huku akimtaka kuusaidia Mkoa kwenye usimamizi wa miradi mikubwa ya maendeleo inayoendelea kutekelezwa ndani ya Makao Makuu kwani bado inaendelea kujengeka.

Aidha Katibu Tawala Mkoa wa Dodoma Bw. Kaspar K. Mmuya, ameshukuru ushirikiano wa Taasisi hiyo na Serikali ya Mkoa hasa katika kusimamia utekelezaji wa miradi ya maendeleo kwani Mhe. Rais ametoa fedha nyingi kwayo, hivyo Mkoa una dhamana ya kuhakikisha miradi hiyo inakamilika kwa wakati na kwa ubora uliokusudiwa.

 Mkurugenzi huyo ametoa shukrani kwa Serikali ya Mkoa kwa ushirikiano unaoipatia Taasisi yake na kusema kuwa Taasisi ina majukumu mengi zaidi ya kushughulikia rushwa ikiwemo kufuatilia utekelezaji wa miradi na upatikanaji wa huduma kwa jamii ili wananchi wafurahie na kuendelea kuiamini na kuipenda Serikali yao.

Mkurugenzi Mkuu huyo  aliambatana na Mkuu wa TAKUKURU Mkoa wa Dodoma Bw. Victor Swella pamoja na Naibu Mkuu wa TAKUKURU Mkoa wa Dodoma Bw. Euginius Hazinamwisho

#dodomafahariyawatanzania

#keroyakowajibuwangu                              

#mtiwangubirthdayyangu