RC SENYAMULE AWATAKA WAKULIMA KUJISAJILI ILI WAWEZE KUFAIDIKA NA RUZUKU YA PEMBEJEO

Imetumwa : January 15th, 2025

Na. Sophia Remmi,

Habari - DODOMA RS

Mkuu wa Mkoa wa Dodoma, Mhe Rosemary Senyamule amewataka wakulima ambao bado hawajajisajili,wajisajili ili waweze kufaidika na ruzuku inayotolewa na Serikali kwenye pembejeo za Kilimo.

Akizungumza wakati akitoa hotuba katika siku ya Mkulima Shambani  iliyofanyika leo Januari 15, 2025 katika makao makuu ya jeshi la Magereza yaliyopo Msalato jijini Dodoma Mkuu wa Mkoa amesema;

"Niwasihi wakulima wote wa Mkoa wa Dodoma,kutumia mfumo wa Ruzuku ya Pembejeo. Ili kutumia mfumo huo, inakubidi kujiandikisha kwa wataalamu na kupata namba ambayo itatumika kununua mbegu na mbolea kwenye maduka ya wafanyabiashara waliojisajili katika mfumo. Wenzenu waliojisajili wanafaidika, wananunua mbolea kwa nusu ya bei".

Aidha Mhe Senyamule ameupongeza uongozi wa kiwanda cha mbolea cha ITRACOM kwa kutoa elimu  kwa Wakulima juu ya matumizi ya mbolea na faida zake.

"Niwapongeze tena ITRACOM kwa elimu hii nzuri na ni imani yangu kuwa wakulima mlioko hapa mtatumia mbolea hii na mkawe mabalozi wa kuwajulisha wenzenu, na tuone mabadiliko ya uchumi kwenu na kwa wananchi wengine".

Kadhalika Mhe. Senyamule, kwa niaba ya Serikali, ameuhakikishia Uongozi wa ITRACOM  kuwa wataendelea kuwapa ushirikiano kama ambavyo wamekuwa wakiwapa ili malengo ya pande zote mbili (Kiwanda na Serikali) yaweze kufanikwa.

Kwa upande mwingine, Mhe. Senyamule amewashukuru Jeshi la Magereza kwa kuanzisha shamba darasa ambalo limekuwa na matokeo mazuri. Sambamba na pongezi hizo, ametoa rai kwa wadau wengine wa Sekta ya Kilimo (Makampuni ya mbegu bora, makampuni ya mbolea za viwandani, jeshi la kujenga Taifa na makampuni ya viuatilifu, kushirikiana katika kutengeneza mashamba darasa mengine mengi ili wakulima waweze kupata elimu kwa kuona.

Katika hatua nyingine Mhe. Senyamule amemshukuru na kumpongeza Rais wa Jamhuri ya Muungano wa Tanzania, Mhe.Samia Suluhu Hassan kwa kuvuta wawekezaji kuja kuwekeza Dodoma, amesema hilo limetokana na kuwepo kwa mazingira wezeshi ya uwekezaji.

Hafla hiyo ambayo Mhe. Senyamule alikuwa mgeni rasmi imelenga kuonesha ufanisi wa mbolea za FOMI katika uzalishaji na tija katika kilimo,mbolea ambazo zinazalishwa na kiwanda cha mbolea cha ITRACOM kilichopo katika kata ya Nala,halmashauri ya Jiji la Dodoma .