WANAFUNZI 194 WALIOREJESHWA SHULENI WAENDELEA NA MASOMO DODOMA

Imetumwa : October 7th, 2024

Na; Happiness E. Chindiye

      Habari - Dodoma RS

Wanafunzi wasichana takribaini 194 Waliorejeshwa shuleni kutokana na changamoto za kupata ujauzito wameendelea na masomo kupitia mpango wa SEQUIP - AEP ( Secondary Education Quality Improvement Project) Mkoani Dodoma.

Hayo yamebainishwa na Kaimu Mkuu wa Mkoa wa Dodoma na Mkuu wa Wilaya ya Kongwa Mhe. Mayeka S. Mayeka wakati wa maadhimisho ya juma la Elimu ya watu wazima na Elimu nje ya mfumo rasmi yaliyofanyika kwenye viwanja vya Shule ya Msingi Hogoro Wilayani Kongwa.

“Mhe. Dkt. Samia Suluhu Hassan, Rais wa Jamhuri ya Muungano wa Tanzania kwa kuwajali wasichana ambao  hawakuweza kupata Elimu ya Sekondari kwenye mfumo rasmi  kwa sababu mbalimbali ameamua kuwarejesha kupitia mpango wa SEQUIP-AEP (Secondary Education Quality Improvement Project).

“Mkoa wa Dodoma tumefanikiwa  kuwarejesha shule wanafunzi wa kike 194 kupitia program hii na zoezi la kuendelea kuwabaini na kuwasajili linaendelea” Ameeleza Mhe. Mayeka

Ameongeza kwa kuwaasa mabinti wote ambao kwa bahati mbaya walikatiza au kukatiziwa masomo kwa sababu mbalimbali kuchangamkia fursa hiyo ya kujiendeleza iliyotolewa na Mheshimiwa Rais kwani elimu ndiyo silaha kuu ya ukombozi wa binadamu.

Naye Afisa Elimu ya Watu Wazima na Elimu Nje ya Mfumo Rasmi Mkoa wa Dodoma Mwl. Borase Itende Chibura amesema, kupitia utekelezaji wa programu ya MUKEJA, wananchi hawafundishwi tu Kusoma, Kuandika na Kuhesabu ( KKK) bali pia Stadi za maisha ili kuwawezesha kujikwamua Kimaisha.

"Mkoa wa Dodoma ni miongoni mwa mikoa miwili nchini inayotekeleza programu ya MUKEJA kupitia vituo viwili vilivyopo katika halmashauri mbili za Kongwa na Kondoa TC hali inayoongeza fursa ya upatikanaji wa elimu kwa watu wazima" Amesema Mwl. Chibura

Kwa Upande Wake Mshauri wa Maendeleo ya uwezo Bw. Matteo Mwita ametoa wito kwa wananchi kuendelea kujitokeza ili kuweza kupata haki yao ya msingi ya kupata elimu kwani ni haki ya kila mtanzania.

Maadhimisho hayo ya mwaka huu 2024 yameongozwa na kauli mbiu isemayo “Ujumuishi katika Elimu  bila Ukomo kwa Ujuzi, Ustahimilivu, Amani na Maendeleo.”

&&&

#dodomafahariyawatanzania

#keroyakowajibuwangu