CMSR WAMALIZA MRADI WA UBORESHHAJI HUDUMA ZA AFYA YA UZAZI NA MTOTO JIJINI DODOMA

Imetumwa : May 19th, 2025

Na. Hellen M. Minja                    

       Habari – DODOMA RS

Wadau wa Afya kutoka Shirika la ‘Community Mobilization of Reciprocal Development’ (CMSR) kutoka Italia linalofadhili mradi wa uboreshaji huduma za afya ya Uzazi na Mtoto katika Halmashauri ya Jiji la Dodoma, leo Mei 19, 2025 wamemtembelea Katibu Tawala Mkoa wa Dodoma Bw. Kaspar K. Mmuya Ofisini kwake Jijini Dodoma kwa lengo la kumuaga kwani wamefikia tamati ya mradi huo Mkoani hapa.

Mradi huo uliokua ukitekelezwa kwa kipindi cha miaka miwili, unafikia ukomo wake mwisho wa mwezi Juni ambapo katika kipindi hicho matokeo makubwa yameonekana katika vituo vilivyokua chini ya ufadhili kwani lengo kubwa ni kuboresha huduma za Mama na Mtoto na kukomesha vifo vitokanavyo na uzazi na watoto.

Aidha, Bw. Mmuya, amewashukuru wadau hao kwa Mradi ambao unanufaisha Mama na Mtoto kwenye jamii huku akiwaomba kutanua wigo hapa Makao Makuu ya Nchi.

“Mradi huu unaboresha familia na unahitajika zaidi maeneo ya Miji kama Bahi, Chamwino, Chemba na mengineyo. Kama mnaweza kuongeza wigo kidogo tutakua na furaha sana kwa sababu nahitaji uwepo wenu, msiende mbali na Makao Makuu wala Tanzania, tunahitaji huduma bora za afya kila eneo ili kufikia lengo”.

Shirika hilo limetekeleza mradi huo kwenye vituo vya afya vinne ambavyo ni Hospitali ya St. Gemma, Kituo cha Afya Mkonze, Kituo cha Afya Hombolo na kituo cha afya Makole. Wadau hao wamewajengea uwezo watoa huduma wa Mama na Mtoto lakini pia wamewezesha ununuzi wa vifaa tiba vya kisasa kwa ajili ya huduma hizo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu