RC SENYAMULE APUNGUZA KERO ZA ARDHI KWA KIWANGO KIKUBWA MKOA WA DODOMA

Imetumwa : August 29th, 2025

Kero za wananchi hasa zile za Ardhi, zinatajwa kupungua kwa kiwango kikubwa kutokana na jitihada za Mkuu wa Mkoa wa Dodoma Mhe. Rosemary Senyamule, Katibu Tawala Mkoa sambamba na Watumishi wa Ofisi yake ikiwa ni agizo la Rais wa Jamhuri ya Muungano wa Tanzania Mhe. Dkt. Samia Sululu Hassan.

Hayo yamebainishwa na Mkuu wa Mkoa huyo alipokua akizungumza wakati wa hafla fupi ya makabidhiano ya ofisi ya Katibu Tawala Mkoa wa Dodoma baina ya Katibu Tawala aliyemaliza muda wake Bw. Kaspar K. Mmuya na yule aliyeteuliwa hivi karibuni Dkt. Khatibu Kazungu katika ukumbi wa ofisi hiyo Jengo la Mkapa Jijini humu Agosti 29, 2025.

“Kwa Dodoma kazi yetu kubwa ni kutatua kero za wananchi, kero sizitatui mimi bali kwa kushirikiana na wasaidizi wangu wa kwanza akiwa RAS na Watumishi wote wengine wa Mkoa wa Dodoma. Zipo kero ambazo ni kubwa tunahangaika nazo, tumepunguza hasa kero za migogoro ya ardhi lakini hazijaisha”. Mhe. Senyamule.

Aidha, Katibu Tawala Mpya Mkoa wa Dodoma Dkt. Khatibu Kazungu amemuhakikishia Mkuu wa Mkoa ushirikiano wa kutosha kwa kutimiza majukumu aliyopewa na Mhe. Rais huku akisisitiza uwajibikaji, juhudi na maarifa ili kuleta tija kwa Mkoa kwa kuzingatia Sheria, Taratibu na Kanuni (STK).

Hata hivyo, Katibu Tawala aliyemaliza muda wake Bw. Kaspar K. Mmuya amesisitiza suala la upendo na viongozi hasa Katibu Tawala Mpya kusimamia utekelezaji wa haki na maslahi ya Watumishi wao jambo ambalo katika utumishi wake alikua akilipa kipaumbele.

Hafla hiyo imekwenda sambamba na chakula cha pamoja kama ulivyo utamaduni kwa kila mwisho wa mwezi,ambapo  hujumuisha Viongozi na Watumishi wa Ofisi hiyo ikiambatana na kusherehekea kumbukizi za siku za kuzaliwa za  Watumishi waliozaliwa  mwezi Agosti kwa kukata keki na kufungua shampeni kama ishara ya upendo na umoja.

 #dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu