DODOMA YADHAMIRIA KUJIKITA KWENYE KILIMO CHA MATUFAHA (APPLES) KUINUA UCHUMI

Imetumwa : May 8th, 2025

Na. Hellen M. Minja

       Habari – DODOMA RS

Mkoa wa Dodoma umedhamiria kujikita kwenye ukuzaji wa uchumi kupitia kilimo cha matunda aina ya Tufaha (Apple). Hii ni kufuatia kauli ya Mkuu wa Mkoa wa Dodoma Mhe. Rosemary Senyamule aliyoitoa alipotembelea Shamba Darasa lililopo eneo la Chinangali II Wilaya ya Chamwino linalozalisha matunda hayo Mkoani hapa kwa lengo la kujifunza uzalishaji wake.

Akiwa shambani hapo, Mhe. Senyamule alipata ufahamu wa namna tunda hilo linavyozalishwa na kutoa rai kwa wanadodoma kujikita kwenye uzalishaji wa tunda hilo adhimu Nchini ambalo hupatikana kwa wingi kwa kuagizwa nje ya nchi hususan nchini Afrika ya Kusini.

“Sisi kwa sababu zao hili halijalimwa katika Mikoa mingi kama zao la kimkakati, tukasema ili kupunguza ushindani na mikoa mingi, tuje na zao la Apple ambalo kwa sasa litakua linapatikana Dodoma. Majaribio ni haya tumeyaona ambayo hili hapa kwetu ni shamba darasa la Mkulima binafsi ambaye alianza kulima mwaka jana na ametusimulia jinsi alivyoona matokeo makubwa.”

Aidha, Mhe. Senyamule amezungumzia soko la Matufaha ambalo ni kubwa kutokana na wingi wake unaoingizwa kutoka nje ya nchi hivyo, endapo kama Mkoa wa Dodoma utafanya kilimo hicho, soko la kutosha linapatikana.

“Apple uzuri wake lina sifa nyingi, bado lina soko kubwa la ndani kwa sababu mengi tunaingiza kutoka nje ya nchi kwa sababu nchi yetu haijaweza kulima ya kujitosheleza, lakini lina soko kubwa la ndani, kama tukilima ndani ya nchi na ikashuka kidogo, bado itakua ni bei nzuri ya kumfurahisha Mkulima.” Ameongeza Mhe. Senyamule.

Aidha, Mkurugenzi wa ‘Mtimbi’s Farm’ Bw. David Mtimbi Mwaka ambaye shamba lake linatumika kama darasa kujifunza kuhusu kilimo cha Matufaha, ameelezea namna alivyoguswa kuanzisha kilimo hicho.

“Niliweka kama majaribio miche 100 nikawa navutiwa kuona kama itakua kama ‘apple’ ya South Afrika au itakua kama tulizozizoea za Tanga na sehemu nyingine? Baada ya kupanda niliambiwa zitaanza kuzaa baada ya miaka miwili na nusu, ili ikue vizuri unatakiwa kumwagilia na zilianza kuzaa katika kipindi cha mwaka mmoja hivyo inawezekana na zina ladha nzuri.”

Mbali na kutembelea shamba darasa hilo, Mhe. Senyamule alipata fursa ya kutembelea mradi wa kilimo cha umwagiliaji unaotekelezwa na kikundi cha Wanyausi Manchali ‘A’ kilichoanzishwa 19/12/2023 ikiwa ni mpango wa Serikali kupitia Wizara ya Kilimo (BBT) kuwachimbia visima na kuweka miundombinu ya umwagiliaji kwa wakulima wadogo.

Mashamba hayo yamewezeshwa kwa kuchimbiwa kisima chenye urefu wa mita 160 kikiwa na uwezo wa kuhudumia mashamba 150 huku Bwawa likiwa na uwezo wa kubeba maji ujazo wa lita 850,000.  Mradi huo umesaidia kuboresha lishe kwa wakulima na jamii inayozunguka eneo hilo, kuongeza maarifa kwa kutumika kama ‘shamba darasa’ pamoja na kuimarisha kipato cha Wakulima.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu