"FUATILIENI MAENDELEO YA MIRADI YA SERIKALI" RC SENYAMULE

Imetumwa : October 6th, 2022

Mkuu wa Mkoa wa Dodoma Mhe. Rosemary Senyamule, amefanya ziara katika Halmashauri ya Kondoa DC lengo likiwa kukagua mradi wa ujenzi wa ofisi mpya ya Halmashauri, kuongea na watumishi pamoja na kufanya mkutano wa hadhara na wananchi wa Kata ya Pahi, Kijiji cha Pahi kinachopatikana ndani ya Halmashauri hiyo.

Katika ziara hiyo Mkuu wa Mkoa ameongozana na Wataalam wa Idara mbalimbali za Mkoa huku akilenga kutatua kero za Wazee, watumishi pamoja na wananchi wa Halmashauri hiyo. Akiongea na watumishi hao, Mhe. Senyamule amekazia suala la elimu kwa kusema kuwa suala hilo linahitaji kuwekewa kikakati zaidi.

“Dodoma tupo chini kielimu lakini Kondoa tupo chini zaidi, bado hatujadhamiria kuondoa ujinga. Naagiza kufanyike vikao vya wadau wa elimu kwa ngazi ya Kata na kila Kata ijitathmini na itengeneza maazimio yake. Nawapa mwezi mmoja hivyo vikao vifanyike na vije na mikakati ya kuongeza ufaulu, kuondoa utoro pamoja na kutatua changamoto ya miundombinu ya madarasa” Amesisitiza

Akipokea ripoti ya maendeleo ya ujenzi wa Ofisi ya Halmashauri kutoka kwa Mkuu wa divisheni ya Miundombinu, maendeleo ya mjini na vijijini Bw. Felchismi Tesha, Bw. Tesha amemueleza mkuu wa Mkoa kuwa mpaka sasa ujenzi wa Jengo hilo umekamilika kwa asilimia 70.Ujenzi wa jingo zima utagharimu Tshs. Bilioni 3.0 mpaka kukamilika kwake na Serikali kuu hutoa Tshs Bilioni Moja kwa mwaka hivyo mpaka sasa tumeshapokea Tshs Bilioni 2 na bado Tshs Bilioni 1 kwa ajili ya kukamilisha ujenzi.Ujenzi unatarajiwa kukamilika mwaka 2023.

Akizungumza na wananchi wa Kijiji cha Pahi, Kata ya Pahi kupitia mkutano wa hadhara na, Mhe. Senyamule amesikiliza kero zao mbalimbali zipatazo 21, ambapo nyingi ya kero hizo zilijikita katika masuala ya umeme, maji, barabara, elimu mikopo ya vikundi pamoja na fedha za TASAF.Mkuu wa Mkoa aliwaagiza wataalamu aliongozana nao kujibu kero za wananchi hao kulingana na sekta zao na hivyo kero zote kupatiwa majawabu.

Akizungumzia suala la fedha za miradi zilizotolewa na Serikali kuu kwa Kata hiyo, Mkuu wa Mkoa amebainisha kuwa Serikali kuu imetoa shilingi Milioni 934 kwa ajili ya mradi wa maji Kijijini hapo ambao bado haujakamilika, shilingi Milioni 500 zimetolewa kwa ajili ya ujenzi wa kituo cha afya kwa ajili ya huduma za afya kwa mama na mtoto pamoja na Tshs. Milioni 46 za kumalizia ujenzi wa Zahanati.

Aidha Mkuu wa Mkoa ameeleza kuwa kwa upande wa elimu, Serikali kuu imetoa kiasi Tshs Milioni 46 kwa ajili ya ujenzi wa vyumba viwili vya madarasa na matundu 6 ya vyoo katika shule ya msingi Kitoa iliyopo kwenye Kata hiyo,  na hivyo amewataka wananchi kufuatilia maendeleo ya ujenzi na kuhakikisha ukamilishwaji wa miradi hii kwani wao ndio wamepewa dhamana ya kusimamia na kuhakikisha inakamilika kwa ubora unaoridhisha kulinga na fedha iliyotolewa.

MWISHO