JENGO JIPYA LA HALMASHAURI YA MPWAPWA KUTATUA CHANGAMOTO YA HUDUMA KWA WANANCHI

Imetumwa : September 18th, 2025

Na. Hellen M. Minja

       Habari – DODOMA RS

Halmashauri ya Wilaya ya Mpwapwa inatarajia kupata jengo jipya la Halmashauri na kutatua changamoto ya miaka mingi kwa Watumishi kutumia jengo lisilokidhi mahitaji yao hali iliyosababisha usumbufu kwa Wananchi pindi wanapohitaji huduma kutokana na kugawanyika kwa Ofisi zake.

Hayo yamebainishwa na Mkuu wa Wilaya ya Mpwapwa Mhe. Dkt. Sophia Kizigo kwa niaba ya Mkuu wa Mkoa wa Dodoma Mhe. Rosemary Senyamule wakati wa ziara ya ukaguzi wa miradi ya maendeleo katika Halmashauri hiyo iliyofanyika leo Septemba 18, 2025.

“Sisi Mpwapwa tunaishukuru Serikali kwa kutuletea fedha kiasi cha Shilingi Milioni 800 na baadae ilituongezea Bilioni 1 kwa ajili ya kuongeza Majengo zaidi ya kutolea huduma. Jengo la halmashauri linalotumika sasa ni la muda mrefu na halikidhi mahitaji na kusababisha baadhi ya Idara kupanga ofisi nje ya jengo, hali inayoleta changamoto katika utoaji wa huduma kwa Wananchi”.

Mradi mwingine uliotembelewa ni Ujenzi wa Ofisi ya Afisa Tarafa ya Mima ambao unagharimu kiasi cha Shilingi Milioni 152 na umefikia 84% ya utekelezaji wake. Mhe. Dkt. Kizigo amesema kukamilika kwa mradi huo kutarahisisha huduma kwa wananchi wa Tarafa hiyo ambao walikua wakitumia gharama kubwa kufika ofisini kwake Mpwapwa Mjini ambapo jengo lililokua likitumika awali lilijengwa mwaka 1956.

Aidha, Mradi wa ujenzi wa nyumba ya Watumishi na ununuzi wa vifaa tiba katika Kituo cha Afya Mima unaofadhiliwa na Shirika la KOFIH 2024/25 na kugharimu kiasi cha Shilingi Milioni 110, umefikia 98% za utekelezaji , ukikamilika utasaidia Watumishi wa Afya watano kupata Makazi.

Halmashauri ya Wilaya ya Mpwapwa imepokea jumla ya fedha kiasi cha Shilingi Bilioni 1.6 kutoka Serikali kuu mwezi Juni 2025 kwa ajili ya ujenzi wa majengo ya Ofisi za kutolea huduma ambazo zitasogeza huduma karibu na wananchi kwani ndio azma kuu ya Serikali.

#dodomafahariyawatanzania

#wekezadodomastawishadodoma

#keroyakowajibuwangu